કચ્છ લોકસભા બેઠક પરથી ભાજપે પોતાના ઉમેદવારની જાહેરાત કરી દીધી છે. જેને લઇ હવે કચ્છમાં રાજકારણ ગરમાયું છે. કોંગ્રેસ કચ્છમાં કોને ઉતારવા તેને લઇને હજુ પણ અસમંજસમાં છે. ત્યારે હવે કચ્છ સીટ પર કોંગ્રેસ સમીકરણો બદલી શકે છે.
વિનોદ ચાવડા કરાયા રિપિટ
કચ્છ લોકસભા સીટ પરથી ભાજપે વિનોદ ચાવડાની ફરી રિપિટ કર્યા છે. ત્યારે સૌથી નાની વયે સાંસદ બનનાર વિનોદ ચાવડાએ પીએમ મોદી અને અમિત શાહનો આભાર માન્યો. તેઓએ કહ્યું કે, કેન્દ્ર સરકારની યોજનાઓનો સીધેસીધો લાભ લોકોને મળે તેને લઇ તેઓ સૌથી વધુ સક્રિય રહ્યા છે.
ઉલ્લેખનીય છે કે, ભાજપ દ્વારા કચ્છ પંથકના ઉમેદવારની જાહેરાત કરી દેવામાં આવી છે, જો કે, ગુજરાત કોંગ્રેસ દ્વારા પોતાના ઉમેદવારને લઇને હજી પણ અસમંજસ રહી છે. જો કે, લોકમુખે એવી પણ વાત ચર્ચાઇ રહી છે કે, કોઇ એવા ઉમેદવારના નામની જાહેરાત કરીને કોંગ્રેસ સમીકરણ બદલી શકે છે. ત્યારે હવે જોવું જ રહ્યું કે, આગામી સમયમાં શું થાય છે.
કોણ છે ભાજપના ઉમેદવાર વિનોદ ચાવડા
કચ્છએ રાજ્યની સૌથી મોટો ભૌગોલિક વિસ્તાર ધરાવતી લોકસભાની બેઠક છે. રાજકીય દ્રષ્ટીએ કચ્છએ અનૂસુચિત જાતિના ઉમેદવાર માટે અનામત બેઠક છે. કચ્છ આખું અને મોરબીનો હિસ્સો કચ્છ લોકસભા બેઠકમાં સમાવેશ થાય છે.
2014ની ચુંટણી વિનોદ ચાવડાએ કોંગ્રેસના દિનેશ પરમારને બે લાખ 54 હજાર મતે હરાવી જીતી હતી. 2014માં લોકસભાની ચૂંટણી સમયે વિનોદ ચાવડાએ કુલ રૂપિયા 56 લાખની મિલકત જાહેર કરી હતી. 2014માં મોદી લહેરમાં વિનોદ ચાવડા પહેલી વાર સાંસદ બન્યા.