રાજ્યસભાની ચૂંટણીના પડઘમ વાગી રહ્યા છે ત્યારે કોંગ્રેસમાંથી એકસાથે 5 ધારાસભ્યોએ રાજીનામું ધરી દેતા ખળભળાટ મચી જવા પામ્યો છે. જેમાં સામેલ અબડાસા બેઠકના પ્રદ્યુમનસિંહ જાડેજાએ રાજીનામું આપવા મામલે પોતાના મતક્ષેત્રના વિકાસ માટે રાજીનામું આપ્યું હોવાની વાત કરી હતી.
પ્રદ્યુમનસિંહ જાડેજાએ સોશિયલ મીડિયામાં વીડિયો શેર કર્યો
''મે મારા મતક્ષેત્રના વિકાસ માટે રાજીનામું આપ્યું છે''
કોંગ્રેસે ધારાસભ્યને કર્યા સસ્પેન્ડ
ઉલ્લેખનીય છે કે, ધારાસભ્ય તરીકે રાજીનામું આપ્યા બાદ પ્રદ્યુમનસિંહ જાડેજાએ પ્રથમ વખત નિવેદન આપ્યું હતું. તેઓએ સોશિયલ મીડિયામાં વીડિયો શેર કરી કહ્યું કે મેં મારા મતક્ષેત્રના વિકાસ માટે રાજીનામું આપ્યું છે. મુખ્યમંત્રી અને નાયબ મુખ્યમંત્રીએ મને મારા મતક્ષેત્રના વિકાસની ખાતરી આપી છે. આ સાથે જ તેમણે વધુમાં કહ્યું કે, મે કોઇના દબાણમાં રાજીનામું નથી આપ્યું.
કચ્છની અબડાસા બેઠક ખાલી થઇ
ધારાસભ્ય પ્રદ્યુમ્નસિંહ જાડેજાએ કોંગ્રેસના ધારાસભ્ય પદેથી રાજીનામુ આપતા કચ્છની અબડાસા બેઠક ખાલી થઇ છે. જેથી અબડાસા બેઠક પર હવે પેટા ચૂંટણી યોજાશે. વિધાનસભા અધ્યક્ષે રાજીનામું સ્વીકારતા પેટા ચૂંટણી યોજાશે. સૂત્રો તરફથી મળતી માહિતી પ્રમાણે આગામી પેટાચૂંટણી પ્રદ્યુમ્નસિંહ જાડેજા નહીં લડે. પરંતુ તેમને બોર્ડ કે નિગમની જવાબદારી સોંપાશે. તો બીજી તરફ એવી પણ ચર્ચા છે કે અબડાસા બેઠક પર ભાજપ IPS અધિકારીને ચૂંટણી મેદાને ઉતારી શકે છે.
મહિલાઓએ પ્રદ્યુમનસિંહ જાડેજાનો મહિલાઓએ કર્યો વિરોધ
કચ્છમાં પ્રદ્યુમનસિંહ જાડેજાનો મહિલા કોંગ્રેસ દ્વારા વિરોધ કરવામાં આવ્યો. પદ્યુમ્નસિંહ જાડેજાની પત્રકાર પરિષદમાં મહિલા કોંગ્રેસે બંગડીઓ મૂકી વિરોધ કર્યો હતો.
પ્રદ્યુમનસિંહ જાડેજા રાજીનામા મામલે રાજકીય ગરમાવો
કચ્છના અબડાસાના ધારાસભ્ય પ્રદ્યુમનસિંહ જાડેજાના રાજીનામા મામલે રાજકીય માહોલ ગરમાયો છે. પ્રદ્યુમનસિંહના રાજીનામાની વાત સામે આવતા સોશિયલ મીડિયા પર શાબ્દિક યુદ્ધ છેડાયું છે. અબડાસા કોંગ્રેસના પ્રમુખ ઈકબાલ મંધરાએ સોશિયલ મીડિયા પર હૈયાવરાળ ઠાલવી છે અને લખ્યું છે કે, અબડાસા વિધાનસભા ફરી વિધવા બની છે. તો કોંગ્રેસની અગ્રણીઓએ ગદ્દાર કહીને પ્રદ્યુમનસિંહ જાડેજાએ રોષ વ્યક્ત કર્યો હતો.