કચ્છ: કંડલામાં ફરી એકવાર જોખમી કેમિકલ લિકેજની ઘટના સામે આવી છે. મળતી માહિતી પ્રમાણે ઈફ્કો ગેટની સામે ઝેરી કેમિકલની લાઈન લિકેજ થઈ છે.
લાઈન લીકેજ થતાં આસપાસના લોકોને આંખોમાં બળતરા અને શ્વાસ લેવામાં તકલીફ પડતી હોવાની ફરિયાદો પણ સામે આવી રહી છે. જોકે ઘટના અંગે જાણ થતા જ ફાયર બ્રિગેડની ટીમ ઘટના સ્થળે પહોંચી ગઈ છે અને લીકેજને બંધ કરવાના પ્રયાસ હાથ ધરાયા છે. જોકે આ સમગ્ર મામલે પૂર્વ કચ્છ GPCB મૌન ધારણ કરીને બેઠું છે.
ઉલ્લેખનીય છે કે ગાંધીધામના કંડલા પાસે અવારનવાર કેમિકલ અને ગેસ લીકેજની ઘટનાઓ બનતી રહે છે. ત્યાં આવેલા ઇફ્કો પ્લાન્ટના ગેટ પાસે કેમિકલની પાઇપલાઇનમાં લીકેજની ઘટના થોડા સમયગાળા પહેલા પણ બની હતી. જેના કારણે 15 વ્યક્તિઓને તેની આડઅસર થતાં નજીકની હોસ્પિટલમાં સારવાર માટે ખસેડવામાં આવી હતી.
ત્યારે ગઇકાલે પણ ફરીએકવાર કેમિકલની લાઇનમાં લીકેજ થતાં વાતાવરણ પ્રદુષિત બન્યું હતુ અને સ્થાનિક લોકોને આંખોમાં બળતરા થવા લાગી હતી. આ મામલા અંગેની જાણ નજીકના ફાયર વિભાગને કરવામાં આવતા તેઓ તાત્કાલિક અસરથી ઘટના સ્થળે આવી પહોંચ્યા હતા.