છેલ્લાક કેટલાક સમયથી રાજ્યમાં ડ્રગ્સ ઝડપાવાની ઘટના વધી રહી છે. ત્યારે આ ડ્રગ્સ ક્યાંથી આવે છે. કેવી રીતે ગુજરાતમાં ડ્રગ્સને ઘૂસાડવાની કોશિશ કરવામાં આવે છે તે પણ એક મોટો સવાલ છે.
છેલ્લા ત્રણ દિવસથી કચ્છના ક્રીક એરિયામાંથી છૂટા છવાયા ડ્રગ્સના પેકેટની ઘટના સામે આવ્યા બાદ હાલ કચ્છની દરિયાઇ પોલીસ ઉપરાંત બીએસએફ તથા ઇન્ડિયન કોસ્ટગાર્ડ દ્વારા એક સર્ચ ઓપરેશન હાથ ધરવામાં આવ્યું હતું. 21મી મેના રોજ જખૌના દરિયામાંથી પકડાયેલા ડ્રગ્સના મોટા કન્સાઇમેન્ટ દરમિયાન પાણીમાં પડેલા ડ્રગ્સના પેકેટને શોધવાની કાર્યવાહી કરવામાં આવી છે.
જેમાં પાકિસ્તાન તથા અફઘાનિસ્તાનના વિસ્તારમાં તૈયાર થયેલું ડ્રગ્સ કચ્છના દરિયાઇ માર્ગે શ્રીલંકા તરફ જઇ રહ્યું હતું. આ દરમિયાન કરોડો રૂપિયાના 136 જેટલા પેકેટ પકડાય તે પહેલા જ પાણીમાં ફેંકી દેવાયા હતા. ત્યારે પોલીસને છેલ્લા ત્રણ દિવસથી ચારથી પાંચ જેટલા ડ્રગ્સના પેકેટ મળી રહ્યાં છે. જેને લઇ કોસ્ટગાર્ડ તથા બીએસએફ જહાજો ઉપરાંત સ્પીડબોટ થકી કચ્છનાં સમગ્ર દરિયાઇ વિસ્તારનાં એકેએક ભાગનું આ ઓપરેશન દ્વારા ચેકિંગ કરવામાં આવ્યુ છે.