ક્ચ્છ ડિસ્ટ્રિક્ટ સેન્ટ્રલ કૉ-ઓપરેટીવ બેંકમાં થયેલી કરોડોની નાણાકીય ગેરરીતિ બાબતે સીઆઇડી ક્રાઈમની ટીમે કચ્છમાં ધામા નાખી 26 વ્યક્તિઓની ધરપકડ કરી છે સાથે કેસમાં તપાસનો ધમધમાટ તેજ બન્યો છે. મહત્વનું છે કે, કચ્છ ડિસ્ટ્રીક્ટ બેંકમાંથી બેંકના અધિકારીઓ અને મળતિયાઓ દ્વારા 100 કરોડ રૂપિયાની લોન ખોટી મંડળી ઉભી કરી તથા ખેડૂત સભાસદોના નામે બારોબાર લીધાનું કૌભાંડ બહાર આવ્યું છે.
KDCC (ક્ચ્છ ડિસ્ટ્રિક્ટ સેન્ટ્રલ કૉ-ઓપરેટીવ) બેંકમાં થયેલી નાણાકીય ગેરરીતિ બાબતે માર્ચ 2015માં ભુજના દીપકભાઈ કટારીયાએ ફરિયાદ કરી હતી. જ્યાર બાદ નલિયા કોર્ટે આ મુદ્દે સ્ટે આપ્યો હતો જે વિરુદ્ધ બેંકે હાઇકોર્ટમાં અપીલ કરતા ઓક્ટોબર 2018માં સ્ટે ઉઠી ગયો હતો. જેથી CID ક્રાઇમની ટીમે આ કેસમાં તપાસનો ધમધમાટ શરૂ કર્યો હતો. જેમાં જ્યંતી ભાનુશાલી હત્યા કેસના આરોપી જ્યંતી ઠક્કર ડુમરાવાળાની ધરપકડ બાદ તપાસ કરતા આઠ મંડળીઓની સંડોવણી ખુલી હતી. CID ક્રાઈમના DIG ગૌતમ પરમાર અને વિવિધ ટીમે કૌભાંડ મુદ્દે ક્ચ્છમાંથી 26 આરોપીઓની ધરપકડ કરી છે.
અબડાસા તાલુકાની ભાવેશ સેવા સહકાર મંડળી, ચિયાસર સેવા સહકારી મંડળી, ભૂમિકા સેવા સહકારી મંડળી, આઈશ્રી સોનલ સહકારી મંડળી, માંડવી તાલુકાની સાંભરાઈ સેવા સહકારી મંડળી, ભોજાય સેવા સહકારી મંડળી, કોકલીયા સેવા સહકારી મંડળી અને દેઢિયા સેવા સહકારી મંડળી વિરુદ્ધ ફરિયાદ નોંધવાઇ છે. આ આઠેય મંડળીઓના ઓળખાયેલા 26 આરોપીઓની પૂછપરછ અર્થે ધરપકડ કરાઈ છે.
કચ્છ ડિસ્ટ્રીક્ટ બેંકમાંથી 100 કરોડ રૂપિયા કૌભાંડ
ઉલ્લેખનીય છે કે, KDCC બેંક કૌભાંડ બહુચર્ચિત રહ્યું છે અંદાજે 100 કરોડ રૂપિયાની બોગસ આધારોના આધારે નાણાકીય ગેરરીતિ આચરવામાં આવી હોવાનું ખુલ્યું હતું. આ કેસમાં આરોપીઓની પૂછપરછમાં વધુ હકીકતો સામે આવશે.
એક જ દિવસમાં 30 કરોડ રૂપિયા મંજૂર થયા અને ઉપાડી લેવાયા
કચ્છ ડિસ્ટ્રીક્ટ બેંકમાંથી બેંકના અધિકારીઓ અને મળતિયાઓ દ્વારા 100 કરોડ રૂપિયાની લોન ખોટી મંડળી ઉભી કરી તથા ખેડૂત સભાસદોના નામે બારોબાર લીધાનું કૌભાંડ બહાર આવ્યું છે. આ કૌભાંડ દરમિયાન એક જ દિવસમાં 30 કરોડ રૂપિયાની રકમ કચ્છ ડિસ્ટ્રીક્ટ બેંક દ્વારા જુદાજુદા વ્યક્તિઓના નામે મંજૂર કરવામાં આવી હતી. તે રકમ એક જ દિવસમાં બેંકમાંથી ઉપાડી લેવામાં આવી હતી. આ કૌભાંડ બે વર્ષથી આચરવામાં આવી રહ્યું હતું અને ભાજપના ભૂતપૂર્વ ધારાસભ્ય જ્યંતિ ભાનુશાળીની હત્યાના આરોપી જ્યંતિ ઠક્કરની પૂછપરછ દરમિયાન સમગ્ર વિગતો બહાર આવી છે. જેમાં જ્યંતી ઠક્કરની સંડોવણી છે. DGP ગૌતમ પરમારની આગેવાનીમાં ક્રાઇમ બ્રાન્ચે કરેલી કાર્યવાહીમાં 26 જેટલા આરોપીઓની ધરપકડ કરી લેવામાં આવી છે.