કચ્છનો બન્ની વિસ્તાર અંતરિયાળ કહી શકાય તેવો છે. અહીં પહેલાથી શિક્ષણનું પ્રમાણ ઓછું છે. આ વિસ્તારના લોકો મુખ્યત્વે પશુપાલકો છે. તેઓને દુકાળ જેવા સંજોગોમાં હિજરત કરવી પડતી હોય છે. વારંવાર માતા- પિતાને સ્થળાંતર કરવું પડતું હોવાંથી બાળકો વ્યવસ્થિત શિક્ષણ મેળવી શકતા નથી. તેમાં આ વખતે પડેલા ભારે વરસાદના કારણે અહીંના દસેક જેટલા ગામોમાં પાણી ભરાયા છે.
ઘરોમાં રહી શકાય તેવી સ્થિતિ ન હોવાથી મોટાભાગના ગ્રામજનોએ સ્થળાંતર કર્યું છે. આવી સ્થિતિમાં બાળકોનું શિક્ષણ બગડે નહીં તે માટે કચ્છ જિલ્લા પ્રાથમિક શિક્ષણ વિભાગ દ્વારા અલગ અલગ વિસ્તારમાં સાત જેટલી હંગામી પ્રાથમિક શાળાઓ ટેન્ટમાં (Tent) ચાલુ કરાઇ છે. બન્નીનાં (Banni) નિચાણવાળા વિસ્તારમાં આવેલા ગુગરગુઇ, છછલા, ભગાડિયા, નાના- મોટા લુણા, સરાડા, શેરવો, મીઠડી, ભિટારા અને ઉધમા ગામોમાં પાણી ભરાયા છે.
આવી સ્થિતિમાં ગામના લોકો ઉંચાણવાળા વિસ્તારમાં સ્થળાંતરિત થયા છે. પાણી ઓસરી ગયા પછી તેઓ ગામમાં પરત ફરી શકતા હોય છે. સામાન્ય રીતે બેથી ત્રણ મહિના સુધી લોકોને ઉંચાણવાળા વિસ્તારમાં રહેવું પડતું હોય છે. આ દસ જેટલા ગામોના એકાદ હજારની આસપાસના બાળકોનો અભ્યાસ ન બગડે તે હેતુથી જિલ્લા પ્રાથમિક શિક્ષણ વિભાગ દ્વારા ટેન્ટમાં હંગામી પ્રાથમિક શાળાઓ શરૂ કરાઇ છે.
પ્રાથમિક શિક્ષણાધિકારી સંજય પરમારના જણાવ્યા મુજબ, ‘આ એકાદ હજાર બાળકો માટે સાત પ્રાથમિક શાળાઓ શરૂ કરાઇ છે. જેમાં 39 શિક્ષકો બાળકોને ભણાવે છે. આ બાળકોનું શિક્ષણ (Education) ન બગડે તે માટે પાઠ્યપુસ્તકો, નોટબુકો અને અન્ય શૈક્ષણિક સાધનો પણ આપવામાં આવ્યાં છે. આમ દસેક ગામના બાળકો અત્યારે ટેન્ટમાં બેસીને ભણી રહ્યાં છે.