કોંગ્રેસ પ્રદેશ પ્રમુખ અમિત ચાવડા લેશે કચ્છનાં અછતગ્રસ્ત વિસ્તારની મુલાકાત

કચ્છ: કોંગ્રેસ પ્રદેશ અમિત ચાવડા આજે કચ્છની મુલાકાત લેશે. અમિત ચાવડા બે દિવસ માટે કચ્છ જિલ્લાની મુલાકાત લેશે. જેમાં તેઓ અછતગ્રસ્ત બન્ની અને ખાવડા વિસ્તારની મુલાકાત લેશે. જેમાં ઘાસચારા પાણી અને રોજગારી જેવી સમસ્યાઓ અંગે તાગ મેળવશે. આ તમામ માહિતી મેળવીને તેઓ કચ્છની પરિસ્થિતિ અંગે મુખ્યમંત્રીને રજૂઆત કરશે.   

ઉલ્લેખનીય છે કે રાજ્યમાં વરસાદ ખેંચાયો છે. ખાસ કરીને કચ્છમાં તથા ઉત્તર ગુજરાતમાં ઓછા વરસાદને કારણે ખેડૂતોની હાલત કફોડી બની છે જ્યારે કચ્છના અનેક વિસ્તારમાં પીવાના પાણીની પણ અછત જોવા મળી રહી છે.

ગત વર્ષે ઉત્તર ગુજરાતમાં લીલો દુકાળ પડ્યો હતો. જેમાં મોટા ભાગના વિસ્તારમાં પાક ધોવાઇ ગયો હતો તો કેટલાય ગામોમાં પાણી ફરી વળતા લોકો પણ પરેશાન થયા હતા.

ત્યારે રાજ્ય સરકાર દ્વારા આ મામલે હજી સુધી કોઇ ચોક્કસ પગલા નહીં લેવામાં આવતા કોંગ્રેસના પ્રદેશ અધ્યક્ષ કચ્છની મુલાકાત કરીને અછતગ્રસ્ત વિસ્તાર અંગેની માહિતી મેળવીને રાજ્યના મુખ્યપ્રધાન પાસે રજૂઆત કરવાના છે.

જો કે ગઇકાલે રાજ્યના મુખ્યમંત્રી વિજય રૂપાણીએ કચ્છ અને ઉત્તર ગુજરાતમાં અછત અંગની કામગીરી આગામી 1 ઓક્ટોબરથી શરૂ કરવાની વાત કરી હતી.