કચ્છમાં વરસાદ ખેંચાતા આ વર્ષે ખારેકના ઉત્પાદનમાં 25 ટકા જેટલો વધારો થયો છે. ખારેકના પાકમાં વધારો થયો હોવાથી બાગાયાતી ખારેકના પાક લેતા ખેડૂતોમાં ખુશી જોવા મળી હતી અને ખારેક વેચતા ખેડૂતોના સ્ટોલ પર લોકોની ભારે ભીડ જોવા મળી હતી.
દેશી ખારેક 200થી 250 રૂપિયે કિલો વેચાઈ રહી છે. કચ્છની ખારેક ગુજરાતના અન્ય જિલ્લાઓ સાથે દિલ્હી રાજસ્થાન હરિયાણા બેંગ્લોર હૈદરાબાદ તમિલનાડુમાં વેંચાઈ રહી છે. ઉલ્લેખનીય છે કે કચ્છમાં 18 હજાર હેક્ટર એટલે કે 45 હજાર એકરમાં ખારેકનું વાવેતર કરાયું છે. ત્યારે ખારેકનું વેચાણ કરતા વેપારીઓના અંદાજ મુજબ પોણા બે લાખ મેટ્રીક ટન જેટલું ઉત્પાદન થવાની શક્યતા છે અને કચ્છી મેવા તરીકે જાણીતી ખારેક આશરે સાડા ત્રણસો કરોડનો કારોબાર કરી આપશે.
ઉલ્લેખનીય છે કે કચ્છ ઠેકઠેકાણે સ્ટોલ ઉભા કરીને ખારેકનું વેચાણ કરવામાં આવી રહ્યું છે. ૭૦૦ એકરમાં ખારેકનું વાવેતર કરનાર ખેડુતના સ્ટોલ પર લોકોની ભીડ જોવા મળી. કેન્યામાં ધંધાર્થે સ્થાયી થયેલા એક એનઆરઆઈએ સ્ટોલ પરથી ખારેક ખરીદતી વખતે આ કચ્છી મેવાના ભરપેટ વખાણ કર્યા અને વિદેશમાં કચ્છી ખારેકનું નામ હોવાનું જણાવ્યું હતું.
આપને જણાવી દઇએ કે ભારે ક્ષાર વાળા પાણીથી પણ પાકી જતા આ મીઠા ફળ થકી કચ્છના બાગાયત ખેડુતો મબલખ કમાણી કરી રહ્યા છે અને અનુભવી ખેડુતો કહે છે કચ્છમાં ખારેકની ખેતીનું ભવિષ્ય ઉજ્જવળ છે.કચ્છના ખેડુતોને આર્થિક રીતે સધ્ધર બનાવનાર બાગાયત ફળો કેશર કેરી અને દાડમને ઉત્પાદનની બાબતમાં ખારેકે પાછળ છોડી દીધા છે.