સુરતના વરાછાના માનગઢ પાસે મહીલા પોલીસ કર્મી સુનીતા યાદવ સાથે કુમાર કાનાણીના પુત્રની બબાલનો ઓડીયો વાયરલ થયો હતો. જે બાદ હવે પ્રકાશ કાનાણીના મિત્રો અને મહિલા કોન્સ્ટેબલની બબાલનો વીડિયો પણ સામે આવ્યો છે. રાત્રી કર્ફ્યુ લાગુ પડ્યા બાદ ધારાસભ્યના દિકરાના મિત્રો બહાર નિકળ્યા હતા. ત્યારે મહિલા કોન્સ્ટેબલે કાર રોકતા બબાલ થઈ હતી. પ્રકાશ કાનાણીએ પણ મહિલા કોન્સ્ટેબલ સાથે બબાલ કરી હતી. જેનો વીડિયો સામે આવ્યો છે.
સુરતમાં મહિલા કોન્સ્ટેબલ સાથે કુમાર કાનાણીના દિકરાના અભદ્ર વર્તનનો મામલો
પ્રકાશ કાનાણીના મિત્રો અને મહિલા કોન્સ્ટેબલની બબાલનો વીડિયો સામે આવ્યો
રાત્રી કફર્યૂ લાગુ પડ્યા બાદ ધારાસભ્યના દિકરાના મિત્રો બહાર નિકળ્યા હતા
સુરતમાં કુમાર કાનાણીના પુત્ર અને મહિલા પોલીસકર્મી વચ્ચે બબાલની ઘટના સામે આવી હતી. પ્રકાશ કાનાણી અને તેના મિત્રોએ કરેલી બબાલનો ઓડિયો બાદ હવે વીડિયો પણ વાયરલ થયો છે. સુરતના વરાછામાં કુમાર કાનાણીના દીકરાના મિત્રો રાત્રે ફરવા નિકળ્યા હતા. જેમને રોકવામાં આવતા બબાલ થઇ હતી. મહિલા પોલીસ કર્મીએ તેના મિત્રોને અટકાવતા પ્રકાશ કાનાણી પણ ઘટના સ્થળે પહોંચ્યા હતા. MLA લખેલી કાર લઈને પ્રકાશ કાનાણી ઘટના સ્થળે પહોંચ્યા હતા. જોકે પ્રકાશ કાનાણીએ શાંતિ જાળવવા અપીલ કરી હતી. પરંતુ બાદમાં પ્રકાશ કાનાણીની પણ મહિલાકર્મી સાથે બબાલ થઈ હતી. બન્ને વચ્ચે બબાલની વીડિયો ક્લીપ વાયરલ થઇ છે.
મહિલા પોલીસ કર્મીએ રાજીનામું આપી દીધું હતું
મહત્વનું છે કે, આ અગાઉ ઓડિયો ક્લીપ વાયરલ થયા બાદ મામલો ગરમાતા ઉચ્ચ પોલીસ અધિકારીઓ સુધી વાત પહોંચી છે. ઉચ્ચ અધિકારીઓએ મહિલા પોલીસકર્મીને ઘરે જવાના આદેશ આપ્યા હતા. ઉચ્ચ પોલીસ અધિકારીઓએ મહિલાકર્મીને તાબડતોડ ઘરે મોકલ્યા હતા. આ ઘટના બાદ મહિલા પોલીસ કર્મીએ રાજીનામું આપી દીધું હતું.
સોશિયલ મીડિયામાં #I support sunita yadavના નામે ટ્રેન્ડ
સુનિતા યાદવે મંત્રીના પુત્ર અને અધિકારીઓની વાત ના સ્વિકારી અને પોલીસની નોકરીમાંથી રાજીનામું આપી દેવાની વાત સામે આવતા હવે સોશિયલ મીડિયામાં #I support sunita yadavના નામે ટ્રેન્ડ શરૂ થયો છે.
હવે મુખ્યમંત્રીએ કુમાર કાનાણીને આપ્યો ઠપકો
આ મામલે કુમાર કાનાણીને મુખ્યમંત્રીએ પણ ઠપકો આપ્યો હતો. કુમાર કાનાણીના પુત્ર દ્વારા કરવામાં આવેલા વર્તન બદલ ઠપકો આપ્યો હોવાનું સૂત્રો દ્વારા જાણવા મળી રહ્યું છે.
તપાસના આદેશ અપાયા
આ ઘટનામાં બબાલ થયા બાદ સુરતના પોલીસ કમિશનર દ્વારા તપાસના આદેશ આપવામાં આવ્યા છે. સમગ્ર મામલે ACP તપાસ કરશે. પોલીસ કમિશનર દ્વારા વિવાદનો ફણગો ફૂટતા હવે એસીપી સીકે પટેલને તપાસ સોંપવામાં આવી છે.
પ્રધાનમંત્રી નરેન્દ્ર મોદીનો પણ પુત્ર હોય તો હું તેને રોકતીઃ મહિલા પોલીસકર્મી
MLA લખેલી કારને રાત્રે સાડા 10 વાગ્યા બાદ કુમાર કાનાણીનો પુત્ર નીકળ્યો હતો. રાત્રે 10 વાગ્યા બાદ લૉકડાઉનનું કડક અમલ કરાવવા ગૃહ મંત્રાલય દ્વારા કહેવામાં આવ્યું છે. જે ઓડિયોક્લીપ સામે આવી તેમાં મહિલા પોલીસકર્મી ગુસ્સો જોવા મળી રહ્યા છે. પોતાની ડ્યૂટીનું પાલન કરતા આ મહિલા પોલીસકર્મી કહી રહ્યા છે કે પ્રધાનમંત્રી નરેન્દ્ર મોદીનો પણ પુત્ર હોય તો હું તેને રોકતી. ઓડિયો ક્લીપમાં બેફામ વાણી વિલાસ થઈ રહ્યો છે.