IPL 2020માં મુંબઈ ઈન્ડિયન્સની સાથે ચેમ્પિયન બનીને પરત ફરેલા હાર્દિક પંડ્યાનો મોટો ભાઈ કૃણાલ પંડ્યાને મુંબઈ એરપોર્ટ પર રોકવામાં આવ્યો હતો.
ગુરુવારે રાત્રે દુબઈથી મુંબઈ પહોંચેલા કૃણાલ પંડ્યાને ડાયરેક્ટોરેટ ઑફ રેવન્યુ ઈન્ટેલીજન્સ (DRI)ના અધિકારીઓએ રોક્યો હતો. મુંબઈ ઈન્ડિયન્સના ઑલરાઉન્ડર કૃણાલ પંડ્યાને લઈને હવે DRIએ હવે નિવેદન જાહેર કર્યુ છે.
DRIએ કૃણાલ પંડ્યાની મુંબઈ ઍરપોર્ટ પર કરાયેલી અટકાયતને લઈને હવે નિવેદન જાહેર કર્યુ છે. જેમાં જણાવાયું હતું કે કૃણાલ પંડ્યા પાસે મોંઘી અને લક્ઝરી ઘડિયાળ મળી હતી. આવામાં હવે આ મામલો કસ્ટમ વિભાગને સોંપી દેવામાં આવ્યો હતો.
કસ્ટમ વિભાગને OMEGA અને Ambular Piguet ની લાખો રૂપિયાની 4 ઘડિયાળો મળી
કૃણાલ પંડ્યાની પાસે કસ્ટમ વિભાગને OMEGA અને Ambular Piguet ની લાખો રૂપિયાની 4 ઘડિયાળો મળી હતી અને તેને સીમા શુલ્ક માટે ડિકલેર કર્યુ ન હતું અને તેના માટે કોઈ ચાર્જ પણ આપ્યો ન હતો. કૃણાલ પંડ્યાની પાસે ઘડિયાળો જપ્ત કરી લેવાઈ છે અને કસ્ટમના વેલ્યુએશન માટે સોંપી દેવામાં આવી છે. સૂત્રો અનુસાર પંડ્યાને અડધી રાતે જવા દેવામાં આવ્યો હતો.
ઘડિયાળોનું વેલ્યુએશન પૂર્ણ થયા બાદ પંડ્યાને કસ્ટમ ડ્યૂટીના રૂપમાં તેનું વેલ્યુના લગભગ 38 ટકા ચાર્જ ચૂકવવો પડશે. પંડ્યાની વિરુદ્ધ લગાવવામાં આવેલા દંડની રકમ વિશે આગળનો નિર્ણય તંત્ર લેશે. કૃણાલ પંડ્યા દંડ ભરી દેશે ત્યાર બાદ તેની ઘડિયાળો પરત કરી દેવામાં આવશે.
વધુ પ્રમાણમાં સોનું લાવવાના કારણે દંડ લગાવાયો
ગુરુવારે સાંજે કૃણાલ પંડ્યા પાસેથી એરપોર્ટ પર DRIએ સાંજે 5 વાગ્યે પૂછપરછ શરૂ કરી અને વધુ પ્રમાણમાં સોનું લાવવાના કારણે દંડ લગાવાયો હતો. સૂત્રોનું માનીએ તો IPL દરમ્યાન તેણે એક સોનાની ચેન ખરીદી હતી જે ભારતના કાયદાની હેઠળ વધુ માત્રામાં લવાતા સોનાના અંતર્ગત આવતી હતી. પંડ્યાએ આ માટે માફી માંગી અને કહ્યું ભવિષ્યમાં આવી ભૂલ નહી થાય.
ઉલ્લેખનીય છે કે કૃણાલ પંડ્યા મુંબઈ ઈન્ડિયન્સ ટીમનો ભાગ છે. તે ટીમ ઈન્ડિયાના સ્ટાર ઑલરાઉન્ડર હાર્દિક પંડ્યાનો ભાઈ પણ છે. IP:માં બંને ભાઈઓ મુંબઈ ઈન્ડિયન્સ ટીમ તરફથી રમે છે. મુંબઈ ઈન્ડિયન્સ 10 નવેમ્બરે દુબઈમાં ઈન્ડિયન પ્રીમિયર લીગની ફાઈનલ મેચમાં દિલ્હી કેપિટલ્સને હરાવીને પાંચમી વખત ટ્રોફી જીતી હતી.