રાજસ્થાન / કોટામાં 8 કલાકમાં 9 નવજાત શિશુઓના મોતથી હાહાકાર; પરિવારે કહ્યું અમે મદદ માટે પોકારતા રહ્યા અને સ્ટાફ સુઈ ગયો

આ બધા નવજાત 4 થી 5 દિવસનાં હતાં. પરિવારના સભ્યોએ આરોપ લગાવ્યો છે કે બાળકોની હાલત વધુ ખરાબ થતાં અમે મદદ માંગતા રહ્યા, પરંતુ નાઇટ ડ્યુટીનો સ્ટાફ સૂઈ ગયો હતો. વારંવાર કોલ કર્યા પછી પણ, ડોકટરો આવ્યા ન હતા અને ઉલટું અમને ઠપકો આપ્યો હતો અને ઠપકો આપીને ભગાડી દીધા હતા.

આરોગ્યમંત્રી રઘુ શર્માનું અવળું રટણ

તે જ સમયે આરોગ્યમંત્રી રઘુ શર્મા કહે છે કે 3 બાળકોને મૃત જ લાવવામાં આવ્યા હતા, 3 બાળકોને જન્મજાત રોગ હતો અને 3 બાળકો ફેફસામાં દૂધ જવાને કારણે મૃત્યુ પામ્યા હતા. CMO અને આરોગ્યમંત્રીએ સમગ્ર મામલે રિપોર્ટ માંગ્યો હતો. તે જ સમયે, સાંજે ડિવિઝનલ કમિશનર કેસી મીના અને કલેક્ટર ઉજ્જવલ રાઠોડ હોસ્પિટલમાં પહોંચ્યા હતા અને વોર્ડ્સનું નિરીક્ષણ કર્યું હતું.

ગયા વર્ષે ડિસેમ્બરમાં આ હોસ્પિટલમાં 10 નવજાત શિશુઓ 48 કલાકની અંદર મૃત્યુ પામ્યા હતા

બંને અધિકારીઓએ પ્રિન્સિપલ ડો.વિજય સરદાણા, એડિશનલ પ્રિન્સિપલ ડો.રાકેશ શર્મા, અધિક્ષક ડો.એસ.સી. દુલારા, HOD ડો.એ.એલ.બૈરવા સાથે બેઠક યોજી હતી અને તમામ પાસાઓની ચર્ચા કરી જરૂરી સુચના આપી હતી. આશ્ચર્યજનક વાત એ છે કે ગયા વર્ષે ડિસેમ્બરમાં આ હોસ્પિટલમાં 10 નવજાત શિશુઓ 48 કલાકની અંદર મૃત્યુ પામ્યા હતા અને તે આખા દેશમાં ચર્ચાનો વિષય બન્યો હતો.

મંત્રીઓ, અધિકારીઓ અને કેન્દ્રથી લઈને રાજ્ય સરકારના નિષ્ણાતોની ટીમોએ તપાસમાં હિસ્સો લીધો હતો. હોસ્પિટલ મેનેજમેન્ટે બાળ મૃત્યુ વિષયક વિભાગના HODને તમામ મૃત્યુ અંગે વિસ્તૃત તપાસના આદેશ આપ્યા છે.

કડકડતી ઠંડીની વચ્ચે નવજાત શિશુઓ મૃત્યુ પામ્યા

હોસ્પિટલનાં સૂત્રોએ જણાવ્યું હતું કે રાત્રિનું તાપમાન 12 ડિગ્રીની આસપાસ પહોંચી ગયું હતું. અહીં 98 નવજાત શિશુઓ વચ્ચે 71 વોર્મર્સ છે. આવી સ્થિતિમાં, લગભગ દરેક બાળકને વોર્મરની જરૂર હોય છે, પરંતુ ઉપલબ્ધતા હોવા છતાં 11 વોર્મર ખરાબ પડ્યા છે. ગયા વર્ષે પણ વોર્મર્સની અછત બહાર આવી હતી. 10 ડિસેમ્બરે થયેલી તમામ મોત શિયાળાની શરૂઆતમાં થઈ છે. આ સમયે 24 કલાકનું સૌથી ઓછું તાપમાન હતું.

ઠંડીની શરૂઆત થાય તે પહેલા કેમ વ્યવસ્થા નથી કરવામાં આવતી?

નેબ્યુલાઇઝર્સ પણ 56 સંખ્યામાં આવ્યા, પરંતુ 20 ખરાબ છે. ઇન્ફ્યૂઝન પંપની સ્થિતિ પણ અલગ નથી. 89 માંથી 25 બિનઉપયોગી છે.

કડકડતી ઠંડી આવે તે પહેલાં જ કોટાના પરિવારોની ખુશીઓ ઉપર આભ તૂટી પડ્યું હતું. હવે આટલા બધા મોત નીપજ્યા છે તેથી કલેક્ટરથી લઈને આરોગ્ય મંત્રી સુધી તમામ રિપોર્ટ માંગી રહ્યા છે. આવી સ્થિતિમાં સવાલ ઉભો થાય છે કે ઠંડી પહેલા જ જરૂરી વ્યવસ્થા કેમ કરવામાં આવતી નથી?