દિલ્હીમાં યોજાયેલ નેશનલ કરાટે ચૅમ્પિયનશિપમાં પ્રથમ વિજેતા ટીમ ગુજરાત બની, કોમલ આચાર્યના શાનદાર પ્રદર્શનથી ગુજરાતને નેશનલ કરાટેમાં બે એવોર્ડ મળ્યા
કરાટેમાં કોમલ આચાર્ય નેશનલ ચેમ્પિયન બની
બે ગોલ્ડ મેડલ જીત્યા
"દિકરીઓએ આત્મરક્ષણ માટે કરાટે શિખવું જોઈએ"
પાટણની જાણીતી કરાટે ચેમ્પિયન કોમલ આચાર્યનું પાટણમાં ઢોલ નગારાં સાથે સ્વાગત કરવામાં આવ્યું હતું. કોમલ આચાર્યએ દિલ્હી ખાતે યોજાયેલ નેશનલ કરાટે ચેમ્પિયનશિપમાં બે ગોલ્ડ મેડલ જીત્યા છે. કોમલ પાટણમાં પોતાના નિવાસસ્થાને પહોચતાની સાથે સ્વાગત કરવામાં આવ્યું હતું.
આ સાથે સોશ્યલ મીડિયામાં ધારાસભ્ય ચંદનજી ઠાકોર સહિત અનેક લોકોએ કોમલને શુભેચ્છાઓ પાઠવી છે. દિલ્હીમાં યોજાયેલ નેશનલ કરાટે ચૅમ્પિયનશિપમાં પ્રથમ વિજેતા ટીમ ગુજરાત થયું હતું. તો બીજી ટીમ જમ્મુ કશ્મીર જ્યારે ત્રીજી લખનઉની ટીમ વિજેતા થઇ હતી. સમગ્ર રાજ્યની ટીમોમાં ગુજરાતની કોમલે બે ગોલ્ડ મેડલ સાથે ફર્સ્ટ વીનર બની હતી.
ટુંકાગાળામાં મોટી સિદ્ધિ
આ સમયે કોમલે જણાવ્યુ હતું કે યુવતીઓએ આત્મરક્ષણ માટે કરાટે શિખવું જોઈએ. કોમલ આચાર્યએ આ માટે ખુબ કઠોર મહેનત કરી હતી જેનું ફળ હવે તેને એક નહીં બે એવોર્ડના રૂપમાં મળ્યું છે. કરાટેની શરૂઆત એક ડોઠ વર્ષ પહેલા જ ચાલુ કરી હતી જે દરમિયાન તે યુનિવર્સિટીની હોસ્ટેલમાં રહેતી હતી. અને ત્યાંના કોચના માર્ગદર્શન હેઠળ કોમલે ટુકાગાળામાં આ સિદ્ધિ હાંસલ કરી છે. તેમનું કહેવું છે કે ઘણી ઓછી છોકરીઓ કરોટે ક્લાસમાં જોડાઈ હતી. પણ તેમાંથી પણ મોટાભાગની છોકરીઓએ કરાટેના ક્લાસને અલવિદા કહી દીધું હતું
જે બાદ કોમલ આચાર્યનો આત્મવિશ્વાસ અને મહેનત જોઈ કોચ દ્વારા તેમને નેશનલ રમવા માટે નામ આગળ કર્યુ હતુ. જે બાદ દેશની અનેક ટીમોમાં થી આવેલા પ્રતિભાશાળી ખેલાડીઓને માત આપી ગુજરાતની દીકરી ઝળકી ઉઠી છે. કોમલની આ સિદ્ધિથી પાટણ પંથકમાં ખુશીની લાગણી જોવા મળી રહી છે. કોમલ એવોર્ડ લઈ ઘેર પરત ફરતની સાથે જ ઢોલ નગારા સાથે ભવ્ય સ્વાગતથી વધાવી લેવામાં આવી હતી.