કોલકાતા કેસ / મમતા સરકારે તો શરતો સ્વીકારી, છતાંય જૂનિયર ડૉક્ટર્સ કામ પર પરત ન ફર્યા, જાણો કેમ

Kolkata Case : કોલકાતાની ઘટનામાં હવે ડૉક્ટરોની અનેક દિવસોની હડતાળ બાદ હવે સૌથી મોટા સમાચાર સામે આવ્યા છે. વાસ્તવમાં કોલકાતાની ઘટનામાં મુખ્યમંત્રી મમતા બેનર્જીએ મોટી કાર્યવાહી કરી છે. CM મમતા બેનર્જીએ કોલકાતા પોલીસ કમિશનર વિનીત ગોયલ અને ડેપ્યુટી કમિશનર (ઉત્તર) સહિત ચાર અધિકારીઓને હટાવવાની જાહેરાત કરી છે. જેમાં આરોગ્ય વિભાગ સાથે સંકળાયેલા બે અધિકારીઓનો સમાવેશ થાય છે. વિરોધ કરી રહેલા જુનિયર ડોક્ટરોએ મુખ્યમંત્રીના આ નિર્ણયને આવકાર્યો છે અને તેને નૈતિક જીત ગણાવી છે. જોકે તેઓએ હડતાળ પાછી ખેંચી નથી. જુનિયર ડોકટરોનું કહેવું છે કે, જ્યાં સુધી વચનો પૂરા નહીં થાય ત્યાં સુધી અમે અહીં 'સ્વાસ્થ્ય ભવન' (સ્વાસ્થ્ય વિભાગના મુખ્યાલય) ખાતે અમારી હડતાળ અને પ્રદર્શન ચાલુ રાખીશું.

કોલકાતાની આરજી કર મેડિકલ કોલેજમાં આ ઘટનાનો વિરોધ કરી રહેલા જુનિયર ડોકટરોએ સોમવારે રાત્રે કહ્યું કે, જ્યાં સુધી મુખ્યમંત્રી મમતા બેનર્જી તેમની માંગણીઓ સાથે સંબંધિત તમામ વચનો પૂર્ણ નહીં કરે ત્યાં સુધી તેઓ તેમનો વિરોધ અને હડતાળ ચાલુ રાખશે. હડતાળ પર ઉતરેલા તબીબોએ જણાવ્યું હતું કે, તેમની તમામ માંગણીઓ હજુ સુધી સંતોષવામાં આવી નથી. અમે આરોગ્ય સચિવને હટાવવાની પણ માંગ કરી છે. જુનિયર ડોકટરોએ કહ્યું કે, તેઓ આરજી ટેક્સને લઈને સુપ્રીમ કોર્ટમાં મંગળવારે થનારી સુનાવણીની પણ રાહ જોઈ રહ્યા છે. તેમણે કહ્યું, આ આંદોલનની જીત છે. એ વાત સાચી છે કે રાજ્ય સરકારે અમારી મોટાભાગની માંગણીઓ સ્વીકારી છે. જોકે આરોગ્ય વિભાગમાં ભ્રષ્ટાચારના મુદ્દાને લઈને ચર્ચા થઈ હતી અને જ્યાં સુધી તેનું નિરાકરણ નહીં આવે ત્યાં સુધી અમે કામ પર પાછા ફરીશું નહીં.

મેડિકલ એજ્યુકેશનના નિયામક (DME) અને આરોગ્ય સેવાઓના નિયામક (DHS) સિવાય સીએમ મમતાએ ડેપ્યુટી કમિશનર (ઉત્તરી વિભાગ)ને પણ હટાવવાની જાહેરાત કરી છે. CMએ કહ્યું, સુપ્રીમ કોર્ટમાં સુનાવણી બાદ મંગળવારે સાંજે 4 વાગ્યા પછી નવા પોલીસ કમિશનરના નામની જાહેરાત કરીશું. આ એમઓયુ પર મુખ્ય સચિવ મનોજ પંતે હસ્તાક્ષર કર્યા હતા. આરજી કાર હોસ્પિટલ વતી મંત્રણામાં ભાગ લેનાર 42 ડોકટરોના પ્રતિનિધિ મંડળે પણ હસ્તાક્ષર કર્યા હતા.

શું હતી હડતાળ પર ઉતરેલા તબીબોની પાંચ માંગ?

• ઘટનાના આરોપીઓ અને ક્રાઈમ સીન સાથે છેડછાડ કરનારાઓની ધરપકડ કરીને કડક સજા આપવામાં આવે.
• આરજી મેડિકલ કોલેજના પૂર્વ પ્રિન્સિપાલ સંદીપ ઘોષ સામે કાર્યવાહી થવી જોઈએ.
• આરોગ્ય કર્મચારીઓની સુરક્ષા વધારવી જોઈએ. હોસ્પિટલમાં સલામતીના પગલાં સુનિશ્ચિત કરવા જોઈએ.
• રાજ્યની સરકારી હોસ્પિટલોમાં ધમકીભર્યું કલ્ચર સદંતર ખતમ કરવું જોઈએ.
• કોલકાતા પોલીસ કમિશનર વિનીત ગોયલ સહિત દોષિત અધિકારીઓને હટાવવા જોઈએ.

હવે જાણો કઈ કઈ માંગણીઓ સ્વીકારવામાં આવી ?

• ઘટનાના મુખ્ય આરોપી સંજય રાયની ધરપકડ થઈ ચૂકી છે. મેડિકલ કોલેજના પૂર્વ પ્રિન્સિપાલ સંદીપ ઘોષ અને તાલા પોલીસ સ્ટેશનના પોલીસ અધિકારીની પણ પુરાવા સાથે ચેડા કરવાના આરોપમાં ધરપકડ કરવામાં આવી છે.
• કોલકાતા પોલીસ કમિશનર અને ડેપ્યુટી પોલીસ કમિશનરને પણ તેમના પદ પરથી હટાવી દેવામાં આવ્યા છે. મેડિકલ એજ્યુકેશનના નિયામક કૌસ્તવ નાઈક અને આરોગ્ય સેવાઓના નિયામકને દૂર કરવામાં આવ્યા હતા.
• હોસ્પિટલો અને મેડિકલ કોલેજ કેમ્પસમાં સુરક્ષા સંબંધિત અન્ય મુદ્દાઓ પર વિચાર કરવા માટે મુખ્ય સચિવના નેતૃત્વમાં ટાસ્ક ફોર્સની રચનાની પણ જાહેરાત કરવામાં આવી છે. ટાસ્ક ફોર્સમાં હોમ સેક્રેટરી, ડીજીપી, કોલકાતા પોલીસ કમિશનર અને જુનિયર ડોકટરોના પ્રતિનિધિઓ પણ સામેલ હશે. હોસ્પિટલોમાં ફરિયાદોના નિરાકરણ માટે પણ સિસ્ટમ તૈયાર કરવામાં આવશે. હોસ્પિટલોમાં સીસીટીવી અને વોશરૂમ જેવી સુવિધાઓ માટે 100 કરોડ રૂપિયા મંજૂર કરવામાં આવ્યા છે.

તો હવે જાણો કે એવી તે કઈ માંગણીઓ છે કે જેના પર હજી મામલો અટવાયો ?

• આરોગ્ય વિભાગમાં ચાલતા ભ્રષ્ટાચારનો મુદ્દો ઉકેલવો જોઈએ અને આરોગ્ય વિભાગના પ્રિન્સિપલ સેક્રેટરીને પણ હટાવવા જોઈએ. સરકાર હજુ સુધી તેમને હટાવવા માટે સંમત નથી. જુનિયર તબીબોનું કહેવું છે કે આરોગ્ય વિભાગમાં પ્રિન્સિપલ સેક્રેટરીના આશ્રય હેઠળ ભ્રષ્ટાચાર થાય છે. પરંતુ સરકારે પ્રિન્સિપલ સેક્રેટરીને હટાવ્યા નથી. જ્યારે મેડિકલના વિદ્યાર્થીઓ ઘણા સમયથી અગ્ર સચિવને હટાવવાની માંગ કરી રહ્યા છે.
• રાજ્યની સરકારી હોસ્પિટલોમાં આરોગ્ય કર્મચારીઓની સુરક્ષા વધારવામાં આવે. હોસ્પિટલમાં સુરક્ષાના પગલાં સુનિશ્ચિત કરવા જોઈએ. ડોક્ટરોનું કહેવું છે કે અમારો હેતુ હોસ્પિટલમાં ભ્રષ્ટાચારની ગેંગનો અંત લાવવાનો છે. હોસ્પિટલમાં આ ટોળકી સક્રિય છે. હોસ્પિટલોમાં સક્રિય સિન્ડિકેટ્સ અને વિકસી રહેલા ભ્રષ્ટાચાર રેકેટ અંગેની ચર્ચા અધૂરી છે. અત્યાર સુધી અમને આ મામલે માત્ર મૌખિક ખાતરી મળી છે, તેથી અમારી લડાઈ હજી પૂરી થઈ નથી.

શું કહ્યું મમતા બેનરજીએ ?

પશ્ચિમ બંગાળના મુખ્યમંત્રી મમતા બેનર્જીએ સોમવારે જાહેરાત કરી કે કોલકાતાના પોલીસ કમિશનર વિનીત ગોયલને તેમના પદ પરથી હટાવવામાં આવશે. હડતાળ પર ઉતરેલા તબીબો સાથે લગભગ 6 કલાક સુધી ચાલેલી બેઠક બાદ તેમણે આ નિર્ણય લીધો છે. મુખ્યમંત્રીએ કહ્યું કે પીડિત પરિવારે કોલકાતા પોલીસના ડેપ્યુટી કમિશનર (ઉત્તર) વિરુદ્ધ લાંચનો આરોપ લગાવ્યો છે. તેમને પણ દૂર કરવામાં આવશે. મમતા બેનર્જીએ કહ્યું કે, સરકારે વિરોધ કરી રહેલા ડોકટરોની માંગણીઓ સ્વીકારી લીધી છે અને તેમાંથી એક રેપ-હત્યાની સીબીઆઈ તપાસ હતી જેના પર કામ ચાલી રહ્યું છે. ડોકટરો સાથેની મીટીંગ બાદ મમતાએ કહ્યું કે, જુનિયર ડોકટરોની માંગને ધ્યાનમાં લઈને કોલકાતા પોલીસ કમિશનર વિનીત કુમાર ગોયલે મીટીંગમાં કહ્યું કે તેઓ રાજીનામું આપવા તૈયાર છે. વિનીત સાંજે 4 વાગ્યે નવા સીપીને જવાબદારી સોંપશે. પોલીસમાં ફેરફાર ઉપરાંત મેડિકલ એજ્યુકેશન ડાયરેક્ટર કૌસ્તવ નાઈક અને હેલ્થ સર્વિસ ડાયરેક્ટર દેવાશીષ હલદરને પણ તેમના પદ પરથી હટાવી દેવામાં આવ્યા છે. મુખ્યમંત્રીએ કહ્યું કે, બેઠક સકારાત્મક રહી અને સરકારે તબીબોની માંગણીઓ સ્વીકારી લીધી છે. તેમણે જુનિયર તબીબોને કામ રોકવાનો નિર્ણય પાછો ખેંચવા પણ વિનંતી કરી હતી.

CMએ કહ્યું, હવે ડોક્ટરોએ કામ પર પાછા ફરવું જોઈએ

CMએ કહ્યું કે, મેં આંદોલનકારી ડોક્ટરોને કામ બંધ કરવાનો નિર્ણય પાછો ખેંચવાની વિનંતી કરી છે કારણ કે તેમની પાંચમાંથી ત્રણ માંગણીઓ સ્વીકારવામાં આવી છે. વિરોધ કરી રહેલા તબીબો સામે કોઈ કાર્યવાહી કરવામાં આવશે નહીં. મમતાએ વધુમાં જણાવ્યું હતું કે, આરોગ્ય ક્ષેત્રના માળખાકીય સુવિધાઓ સાથે સંબંધિત તમામ બાબતોના ઉકેલ માટે મુખ્ય સચિવની અધ્યક્ષતામાં એક સમિતિની રચના કરવામાં આવી છે. તમને જણાવી દઈએ કે કોલકાતામાં સ્વાસ્થ્ય ભવનની બહાર ડોક્ટરો આઠ દિવસથી વિરોધ પ્રદર્શન કરી રહ્યા છે. જ્યારે તેઓ 38 દિવસથી હડતાળ પર છે અને કામકાજ બંધ કરી દીધું છે.

વધુ વાંચો : 12 વાગ્યે થશે દિલ્હીના નવા CMનું એલાન, આવશે CMના નામ પર સસ્પેન્સનો અંત

જાણો શું છે સમગ્ર મામલો ?

9 ઓગસ્ટના રોજ કોલકાતાની આરજી કાર મેડિકલ કોલેજ અને હોસ્પિટલના સેમિનાર હોલમાં 31 વર્ષીય તાલીમાર્થી મહિલા ડૉક્ટરનો મૃતદેહ પડ્યો હતો. તપાસમાં સામે આવ્યું છે કે, મહિલા ડોક્ટર પર પહેલા બળાત્કાર કરવામાં આવ્યો હતો અને પછી તેની હત્યા કરવામાં આવી હતી. ઘટનાને પગલે જુનિયર તબીબોમાં રોષ વધી ગયો હતો અને તેઓએ હડતાળ શરૂ કરી હતી. દેશભરમાં વિરોધ જોવા મળ્યો હતો.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ