IPLની આ સિઝનની ત્રીજી મેચ આજે ડેવિડ વોર્નરની સનરાઇઝર્સ હૈદરાબાદ અને વિરાટ કોહલીની રોયલ ચેલેન્જર્સ બેંગલુરુ વચ્ચે રમાશે.
IPLની આ સિઝનની ત્રીજી મેચ આજે ડેવિડ વોર્નરની સનરાઇઝર્સ હૈદરાબાદ અને વિરાટ કોહલીની રોયલ ચેલેન્જર્સ બેંગલુરુ વચ્ચે રમાશે. હૈદરાબાદ અત્યાર સુધીમાં એક વાર ખિતાબ જીતવામાં સફળ રહી છે, જ્યારે કોહલી છેલ્લી ૧૨ કોશિશમાંથી એક પણ ખિતાબ ટીમને અપાવી શક્યો નથી. જોકે RCBની ટીમમાં કોહલી- ડી'વિલિયર્સ સહિત દુનિયાના ઘણા વિસ્ફોટક બેટ્સમેનની ફોજ હાજર છે.
બેટિંગ
બેંગલુરુ પાસે કોહલી અને ડી'વિલિયર્સ જેવા વર્લ્ડ ક્લાસ બેટ્સમેન છે અને હવે એરોન ફિંચના આવવાથી ટીમને ઘણી મજબૂતી મળી છે. યુવા બેટ્સમેન દેવદત્ત પડીક્કલ પાસેથી પણ ઘણી આશા રાખવામાં આવી રહી છે, જ્યારે હૈદરાબાદ પાસે ત્રણ વાર ટૂર્નામેન્ટમાં ઓરેન્જ કેપ હાંસલ કરી ચૂકેલો કેપ્ટન ડેવિડ વોર્નર છે. વોર્નર અને જોની બેરિસ્ટો ટૂર્નામેન્ટની સૌથી ખતરનાક ઓપનિંગ જોડીઓમાંની એક છે. એ ઉપરાંત કેન વિલિયમ્સન, મનીષ પાંડે, મિચેલ માર્શ અને ફેબિયન એલન જેવા શાનદાર બેટ્સમેન છે.
બોલિંગ
બેંગલુરુ પાસે ડેલ સ્ટેન જેવા અનુભવી ફાસ્ટ બોલર ઉપરાંત યુઝવેન્દ્ર ચહલ જેવો સ્પિનર પણ છે. જોકે RCBનો બોલિંગ વિભાગ હંમેશાં પોતાની નબળાઈઓને કારણે ચર્ચામાં રહે છે. ચહલ ટીમ ઇન્ડિયાનો નિયમિત ખેલાડી છે. તે નિયમિત રીતે વિકેટ ઝડપતો રહે છે, પરંતુ તે ઘણી વાર મોંઘો પણ સાબિત થાય છે. જ્યારે ફાસ્ટ બોલર ઉમેશ યાદવ પણ RCBનો હિસ્સો છે. ભુવનેશ્વરકુમાર હૈદરાબાદના ફાસ્ટ બોલિંગ આક્રમણનું નેતૃત્વ સંભાળશે, જ્યાંતેને સંદીપ શર્મા, સિદ્ધાર્થ કૌલ અને બાસિત થમ્પી જેવા બોલરનો સાથ મળશે. આ ઉપરાંત હૈદરાબાદ પાસે બોલિંગમાં રાશિદ ખાનના રૂપમાં સૌથી મોટી તાકાત છે.
૨૦૧૬માં હૈદરાબાદે તોડ્યું હતું કોહલીનું સપનું
IPL ૨૦૧૬માં સનરાઇઝર્સ હૈદરાબાદે રોયલ ચેલેન્જર્સ બેંગલુરુનું સપનું તોડી નાખ્યું હતું. ફાઇનલમાં કોહલીની ટીમને હરાવીને હૈદરાબાદે ખિતાબ જીત્યો હતો. એ મેચમાં વોર્નરે ૩૮ બોલમાં ૬૯ રનની વિસ્ફોટક ઇનિંગ્સ રમીને ટીમના સ્કોરને ૨૦૮ રને પહોંચાડી દીધો હતો. તેને બેન કટિંગનો પણ સુંદર સાથ મળ્યો હતો. જવાબમાં RCBની ટીમ તરફથી ઓપનર ક્રિસ ગેલે ૩૮ બોલમાં ૭૬ રન ઝૂડી કાઢ્યા હતા. કોહલીએ પણ ૩૫ બોલમાં ૫૪ રનની ઇનિંગ્સ રમી હતી. આમ છતાં RCBની ટીમ નિર્ધારિત ૨૦ ઓવરમાં ૨૦૦ રન જ બનાવી શકી હતી અને કોહલીનું ખિતાબ જીતવાનું સપનું રોળાઈ ગયું હતું.