કેરળના સૌથી મહત્ત્વપુર્ણ શહેરોમાં એક કોચ્ચી હાલમાં દુનિયાભરના પર્યટકોની વચ્ચે આકર્ષણનું કેન્દ્ર બન્યુ છે. યાત્રાની ઓનલાઇન જાણકારી આપનારી એક કંપનીના જણાવ્યા અનુસાર ટ્રેંડિંગ ટુરિસ્ટ ડેસ્ટીનેશનમાં કોચ્ચી હાલમાં પહેલા નંબરે છે. 2020માં યાત્રીઓના સૌથી ફેવરિટ ટુરિસ્ટ ડેસ્ટીનેશનનું લિસ્ટ તૈયાર કરાયુ હતુ. આ વર્ષે લિસ્ટમાં બે નવી શ્રેણી બનાવાઈ હતી.
પહેલી શ્રેણી એવા સ્થળોની જે વર્તમાન સમયમાં લોકોમાં ખુબ પસંદ થઇ રહ્યા છે એટલે કે ટ્રેન્ડમાં છે. જ્યારે બીજી શ્રેણી ઉભરતા સ્થળોની છે. કંપનીની નાઉ એન્ડ નેક્સ્ટની યાદી મુજબ પસંદ કરાતા સ્થળોમાં કોચ્ચી બાદ ફિલિપાઇન્સનુ લુજોન અને પોર્ટુગલનું પોર્ટો ક્રમશઃ બીજા અને ત્રીજા નંબરે છે. જ્યારે આ યાદીમાં અંતિમ અને 25માં સ્થાને રશિયાનું મોસ્કો છે.
દુનિયાના ઉભરતા ગંતવ્ય સ્થળોની યાદીમાં રશિયાનુ કલિનિનગ્રાદ પહેલા સ્થાન પર છે. જ્યારે અલ્બાનિયાનું સારાંડે બીજા અને લેબનાનનું બેરુત ત્રીજા સ્થાન પર છે. જ્યારે આ યાદીમાં અંતિમ અને 25માં સ્થાન પર આગરા છે. ભારતીય સ્થળો જ્યારે દુનિયાભરના પ્રવાસીઓના આકર્ષણનું કેન્દ્ર બને તે જોવું ખરેખર સન્માનની વાત છે. પર્યટકોની પ્રતિક્રિયા અને તેમની વધતી રુચિ પર તે આધારિત હોય ત્યારે તે વધુ ઉલ્લેખનીય બની જાય છે.
કોચ્ચી કેવી રીતે પહોંચી શકાય
જો હવાઇમાર્ગની વાત કરીએ તો કોચ્ચી દેશના તમામ પ્રમુખ સ્થાનો સાથે હવાઇ માર્ગે જોડાયેલુ છે. તે દેશના તમામ મોટા શહેરો સાથે જોડાયેલુ છે. રેલ માર્ગ દ્વારા પણ તમે સરળતાથી દેશના કોઇ પણ મુખ્ય શહેરથી કોચ્ચી જઇ શકો છો. અહીં બે મુખ્ય સ્ટેશન છે એર્નાકુલમ જંકશન અને એર્નાકુલમ ટાઉન.
શું છે જોવાલાયક?
કોચ્ચી ખરેખર એક અનોખુ પર્યટન સ્થળ છે. દરેક વ્યક્તિએ જિંદગીમાં એકવાર તો કોચ્ચી જોવું જ જોઇએ. કોચી પહેલા કોચીન નામથી જાણીતુ હતુ. આ શહેરનો ઉલ્લેખ પ્રાચીન યાત્રીઓના લેખનમાં પણ કરાયો છે. તેનો સાંસ્કૃતિક ઇતિહાસ પણ ઘણો સમૃધ્ધ છે. ખાવા-પીવાના શોખીનો માટે તો આ સ્વર્ગ છે. અહીંના રસોઇયાઓ દ્વારા બનાવેલુ વેજ-નોનવેજ ફુડ તમારા મોંમા પાણી લાવી દે છે. અહીં પર્યટકોને આકર્ષવા માટે ઘણુ બધુ છે. ધાર્મિક ગતિવિધિઓ માટેના કેન્દ્ર, સંગ્રહાલય, બાળકો માટે પાર્ક, શોપિંગ માટે મોલ. તે પ્રકૃતિપ્રેમીઓને પણ નિરાશ કરતુ નથી. મરીન ડ્રાઇવ કપલ્સ માટે ફરવાની બેસ્ટ જગ્યા છે. અહીં ફેમિલિવાળા પણ ફરવા મોટી સંખ્યામાં આવે છે. અહીં કોચ્ચીનું એકમાત્ર ફિશ સ્પા છે. કોચ્ચીના કિલ્લામાં જતા હો તો આયુર્વેદિક મસાજ કરાવવાનું બિલકુલ ન ભુલતા.