નિયમ / જો ભૂલથી બીજાના ખાતામાં પૈસા ટ્રાન્સફર થઈ જાય તો આ રીતે મેળવો પાછાં, જાણો શું છે RBIનો નિયમ

• કોરોનાકાળમાં ડિજિટલ ટ્રાન્ઝેક્શનમાં જોરદાર વધારો જોવા મળ્યો
• ટ્રાન્ઝેક્શન કરતી વખતે પૈસા બીજાને ટ્રાન્સફર થાય તો કરો આ કામ
• બેંકમાં જઈને સૌથી પહેલાં ઈન્ફોર્મ કરો

હાલમાં, ડિજિટલ વોલેટ, NEFT / RTGS, UPI, Google Pay, BHIM એપ અને અન્ય સેવાઓ દ્વારા પૈસાની લેવડદેવડ સરળ થઈ રહી છે. આ તમામ માધ્યમો પૈસા મોકલવા અથવા મેળવવાની સૌથી સરળ રીત છે. આના કારણે પૈસા ટ્રાન્સફર કરવાનું સરળ બની ગયું છે, પરંતુભૂલો પણ ઘણી થઈ રહી છે. ઘણી વખત જ્યારે પૈસા ટ્રાન્સફર કરતી વખતે બેંક એકાઉન્ટ નંબર લખવામાં ભૂલ થાય છે, ત્યારે બીજાનાખાતામાં પૈસા ટ્રાન્સફર થઈ જાય છે.

તમારી બેંકને તાત્કાલિક જાણ કરો

જો ભૂલથી કોઈ અન્ય વ્યક્તિના બેંક ખાતામાં પૈસા ટ્રાન્સફર થઈ જાય તો સૌથી પહેલાં ફોન અથવા ઈમેલ દ્વારા તમારી બેંકને જાણ કરો. જો શક્ય હોય એટલી જલ્દી બેંકના બ્રાન્ચ મેનેજરને મળો. જેના ખાતામાં પૈસા ટ્રાન્સફર કરવામાં આવ્યા છે એ જ બેંક આ સમસ્યાનો ઉકેલ લાવી શકે છે. તમારી બેંકના ગ્રાહક સેવા કેન્દ્રને ફોન કરો અને તેમને બધું જણાવો. જો બેંક ઈ-મેલ દ્વારા તમામ વિગતો માંગે છે, તો ટ્રાન્ઝેક્શનની સંપૂર્ણ વિગતો મોકલો. આમાં ટ્રાન્ઝેક્શનની તારીખ, સમય, તમારો એકાઉન્ટ નંબર, જ્યાં પૈસા મોકલવામાં આવ્યા હતા તેનો એકાઉન્ટ નંબર મોકલો.

બ્રાન્ચ મેનેજર સાથે મુલાકાત

જો તમે જે બેંક ખાતામાં પૈસા ટ્રાન્સફર કર્યા છે, તે ખાતા નંબર ખોટો છે અથવા IFSC કોડ ખોટો છે તો પૈસા આપમેળે તમારા ખાતામાં આવી જશે. સાથે જ જો એવું નથી, તો પછી તમારી બેંકમાં જાઓ અને શાખા મેનેજરને મળો. તેને આ ખોટા ટ્રાન્ઝેક્શન વિશે સંપૂર્ણ માહિતી આપો. કયા બેંક ખાતામાં પૈસા ગયા તે જાણવો. જો ભૂલથી બીજા બેંક ખાતામાં પૈસા ટ્રાન્સફર થઈ ગયા હોય તો પૈસા પાછા મળવામાં વધુ સમય લાગી શકે છે. કેટલીકવાર બેંકો આવા કેસના સમાધાન માટે 2 મહિના સુધીનો સમય લઈ શકે છે. તમે તમારી બેંકમાંથી જાણી શકો છો કે કઈ શહેરની કઈ શાખામાં પૈસા કયા ખાતામાં ટ્રાન્સફર કરવામાં આવ્યા છે. તમે તે શાખા સાથે વાત કરીને રકમ પાછી મેળવી શકો છો.

FIR કરી શકો છો

કોઈ બીજાના ખાતામાં ભૂલથી પૈસા ટ્રાન્સફર થવાના મોટાભાગના કિસ્સામાં રિસીવર પૈસા પાછા આપવા તૈયાર થઈ જાય છે. જો તે પૈસા પાછા ન આપે તો તેની સામે કેસ કરી શકાય છે. તમે લીગલ એક્શન લઈ શકો છો. બેંકથી કેસ કરીને પણ લીગલ એક્શન લઈ શકાય છે. 
RBIએ નિર્દેશ આપ્યો છે કે જો ભૂલથી કોઈ બીજાના ખાતામાં પૈસા જમા થઈ જાય તો તમારી બેંકે ઝડપી પગલાં ભરવા પડશે. બેંકને ખોટા ખાતામાંથી સાચા ખાતામાં પૈસા પરત કરવાની વ્યવસ્થા કરવી પડશે. આજકાલ પૈસા ટ્રાન્સફર કરવા પર મોબાઈલ અને મેલ પર મેસેજ આવે છે કે જો ટ્રાન્ઝેક્શન ખોટું છે તો આ ફોન નંબર પર મેસેજ મોકલો. તમે આના દ્વારા ફરિયાદ પણ દાખલ કરી શકો છો.