જાણવા જેવું / ચૂંટણીમાં મતદાન પહેલાં આ 7 મહત્વની બાબતો જાણી લેજો, વોટ આમથી તેમ ન થઈ જાય

• સ્થાનિક સ્વરાજની ચૂંટણીમાં મતદાનની રીત જાણો
• વડોદરામાં મતદાનનું માર્ગદર્શન કરાયું
• જાણો કઈ ભૂલ કરવાની છે અને કઈ નહીં

વડોદરા મનપાની ચૂંટણી માટે મતદાનનું માર્ગદર્શન આપવામાં આવ્યું હતું. ચૂંટણીમાં મતદારોએ કેવી રીતે મત આપવો તેનું માર્ગદર્શન આપવામાં આવ્યું હતું. જેમાં કેટલાક નિયમોનું પાલન કરવાનું રહેશે. સ્થાનિક સ્વરાજમાં એક વોર્ડમાંથી 4 ઉમેદવારોની પસંદગી કરવાની હોય છે. જેના માટે લોકોએ પણ 4 મત આપવાના હોય છે.

આ માટે 4 વખત અલગ અલગ ઉમેદવારના નામ સામે 4 વખત બટન દબાવવાનું રહેશે. જો કોઈ મતદાર 4 મત આપ્યા પછી 5માં ઉમેદવારને મત આપશે. તો તેમનો મત રદ થઈ જશે. જો કે, 4થી ઓછા ઉમેદવારને મત આપી શકાય છે. 4 ઉમેદવારને મત આપ્યા પછી રજિસ્ટ્રરનું બટન દબાવવું ફરજિયાત હોય છે. 

મતદારોએ આ 7 મુદ્દાઓને ધ્યાનમાં રાખવાના છે.

મુદ્દો-1 
તમારે મતદાન ક્યા મથક પર કરવાનું છે તે જાણવા માટે રાજકીય પક્ષો અને ચૂંટણી પંચ ઘરે સ્લીપ ડ્રોપ કરે છે, જેમાં તમામ વિગતો જણાવેલી હોય છે. ઓનલાઈન વ્યવસ્થા પણ છે. http://secsearch.gujarat.gov.in/search/default.aspx આ લીંક પર જશો તો તમારું એપીક કાર્ડ નંબર પૂછશે અથવા નામ સરનામા દ્વારા પણ મતદાન ક્યાં કરવાનું છે તે જાણી શકશો.

મુદ્દો-2 
એપીક કાર્ડ ખોવાઈ ગયું હોય તો ચૂંટણી પંચે આધાર કાર્ડ, પાન કાર્ડ, પાસપોર્ટ અને ડ્રાઈવિંગ લાયસન્સ જેવા ફોટો ઓળખકાર્ડને માન્યતા આપી છે. એપીક નંબર સાથે આ દસ્તાવેજો હશે તો પણ તમે મતદાન કરી શકશો

મુદ્દો-3
મહાનગરપાલિકામાં એકવોર્ડમાં 4 ઉમેદવારો હોય. 2 મહિલા 2 પુરુષ. આપણે ત્યાં નગરપાલિકા, મહાનગરપાલિકામાં મહિલા અનામત છે માટે જેટલા ઉમેદવાર પુરુષ હોય એટલા જ ઉમેદવાર મહિલા પણ હોય.

મુદ્દો-4
તમે 1 ઉમેદવારને, 2 ઉમેદવારને, 3ને કે 4 ઉમેદવારને મત આપી શકો. જો તમે 5 બટન દબાવશો તો તમારો મત રદ ગણાશે.

મુદ્દો-5 
તમારે મહત્તમ 4 વાર બટન દબાવવાનું હોય છે. તમને પસંદ હોય તેવા 3,2 કે 1 જ ઉમેદવારને પણ મત આપી શકો, પણ 4 ઉમેદવારથી વધુ ઉમેદવારને મત આપી શકો નહી

મુદ્દો-6 
ઈવીએમમાં જરૂરી નથી કે ભાજપ-કોંગ્રેસ કે આપના ઉમેદવાર એક જ લાઈનમાં હોય. ઉમેદવારોના નામ ઈવીએમમાં ક્કકા પ્રમાણે હોય છે.

મુદ્દો-7
ઈવીએમમાં તમે આપેલા મતોને સુરક્ષિત કરવા માટે ઈવીએમની છેડે પીળા કલરનું બટન હશે. એ દબાવવું ખાસ જરૂરી છે. પીળું બટન દવાબશો પછી જ તમારો મત અપાયો ગણાશે.