ટ્રાવેલ / ગુજરાતના આ મંદિરમાં પ્રસાદ બનાવવાની પરંપરા છે 276 વર્ષ જૂની, શ્રીજીને ધરાવાતો પ્રસાદ દોઢ વર્ષ સુધી નથી થતો ખરાબ

• 276 વર્ષથી પરંપરાગત રીતે જ તૈયાર થાય છે પ્રસાદ
• ચાંદીના બંટામાં ધરાવાય છે શ્રીજીને પ્રસાદ
• પ્રસાદના લાડુ દોઢ વર્ષ સુધી બગડતા નથી

પ્રસાદના લાડુની ખાસ વિશેષતા એ છે કે પ્રત્યેક લાડુ તૈયાર થયા બાદ તેને શ્રીજી સન્મુખ ધરાવવામાં આવે છે. ચાંદીના બંટામાં શ્રીજીને લાડુ અર્પણ કરવાની સાથે સાથે પિત્તળના મસમોટા તપેલામાં પણ લાડુ ધરાવી બાદમાં આ લાડુને પેક કરવામાં આવે છે. આ લાડુ એક વર્ષ બાદ પણ તાજો જ રહે છે. જેને શ્રધ્ધાળુઓ શ્રીજીનું સત્ કહે છે. ડાકોરના શ્રી રણછોડરાયજીના પ્રસાદના લાડુ પણ એકથી દોઢ વર્ષ સુધી એવા ને એવા જ રહે છે.  

લાડુ બનાવવા માટે ખાસ સામગ્રી લાવવામાં આવે છે

ડાકોર મંદિરમાં ફાગણી પૂનમના પર્વ દરમિયાન ત્રણ જ દિવસમાં 3 લાખથી વધુ લાડુનું વેચાણ થાય છે, જ્યારે સામાન્ય દિવસોમાં 20 થી 25 હજાર લાડુનું સરેરાશ વેચાણ થાય છે. ડાકોરમાં બનતાં પ્રસાદીમાં વપરાતી તમામ સામગ્રી વર્ષોથી ચોક્કસ જગ્યાએથી જ લાવવામાં આવે છે. જેમાં લાડુ માટેનું ઘી કાઠિયાવાડથી - વેરાવળથી આવે છે. આ ઘી વલોણાનું જ હોય છે. લાડુમાં વપરાતા ઘઉં પણ ચોક્કસ જગ્યાએથી જ મંગાવવામાં આવે છે.  

જાણો કેવી રીતે બને છે પ્રસાદના આ ખાસ લાડુ? 

ઘઉંને આખી રાત પલાળ્યા બાદ તેને સુકવવામાં આવે છે, બાદમાં તેને દળવામાં આવે છે. આ લોટમાં દળેલી ખાંડ, ઘી, એલચી પાવડર, બરાસા સહિતના દ્રવ્યોનું મિશ્રણ તૈયાર કરવામાં આવે છે. આ મિશ્રણમાંથી હાથેથી લાડુ બનાવવામાં આવે છે. હાથેથી જ બનતા આ દરેક લાડુ આશરે 45થી 55 ગ્રામ વજનના હોય છે. 

લાડુ તૈયાર કરવાની પરંપરા

મંદિરમાં તૈયાર થતાં લાડુની પરંપરા પણ ખાસ છે. લાડુ તૈયાર થતાં હોય ત્યારે બહારની કોઇ જ વ્યક્તિને ત્યાં પ્રવેશ આપવામાં આવતો નથી. લાડુ તૈયાર થયા બાદ પણ કોઇની દ્રષ્ટિ તેની ઉપર ન પડે તે રીતે જ તેને નિજ મંદિરમાં લઇ જઇને શ્રીજીને ધરાવવામાં આવે છે.