દરેક રસોડામાં સપ્તાહમાં એકાદ વખત તો મગનું શાક અથવા તો ફણગાવેલા મગ બનતા જ હશે. મગ પ્રોટીનનો સૌથી સારો પ્લાન્ટ બેઝ્ડ સોર્સ છે. તેમાં એમિનો એસિડ ખૂબ સારાં પ્રમાણમાં છે. આ સિવાય પણ મગમાં અનેક પોષક તત્વો રહેલાં છે. જેથી આજે અમે તમને મગનું નવી જ રીતનું ટેસ્ટી અને સ્પાઈસી શાક બનાવવાની એકદમ સરળ રેસિપી જણાવી રહ્યાં છે. જેને ટ્રાય કર્યા બાદ તમે આ રીતે જ મગ બનાવીને ખાશો. તો ચાલો જાણી લો.
સૌથી પહેલાં મગને 1 કલાક પલાળી દો. પછી ધોઈને કૂકરમાં લઈને તેમાં 1 નાનું બટાકું છોલીને તેના કટકા પણ મગમાં નાખીને 5 સીટી વગાડી દો. હવે લીલી ડુંગળી, લીલું લસણ, સૂકી ડુંગળી બધું ઝીણું સમારી લો. હવે એક પેનમાં 3 ચમચી તેલ ગરમ મૂકીને તેમાં થોડી રઈ, થોડું જીરું, હીંગ નાખીને લીલું લસણ, લીમડો નાખી સાંતળો. પછી તેમાં આદુ, મરચાં લસણની પેસ્ટ નાખો. હવે તેમાં લીલી ડુંગળી અને સૂકી ડુંગળી એડ કરીને બરાબર સાંતળો. પછી તેમાં અડધી ચમચી હળદર, થોડું ધાણાજીરું પાઉડર મિક્સ કરો. સ્પાઈસી બનાવવા માટે 1 ચમચી લાલ મરચું નાખો. હવે મગ અને બાફેલાં બટાકા નાખી દો. હવે તેમાં અડધો કપ પાણી ઉમેરો. છેલ્લે સ્વાદ મુજબ મીઠું નાખો. હવે પાંચ મિનિટ ઢાંકીને મગ થવા દો અને પછી પાંચ મિનિટ ખુલ્લા થવા દો. છેલ્લે એક લીંબુનો રસ મિક્સ કરીને સર્વ કરો. તૈયાર છે ટેસ્ટી અને સ્પાઈસી મગની આ રેસિપી.