દિવાળી હવે આવી ગઈ છે. એવામાં જો છેલ્લે છેલ્લે તમારે મિઠાઈ બનાવવાની બાકી હોય તો ગુજરાતી સ્પેશિયલ ઘૂઘરા બનાવી શકો છો. આ ફટાફટ બની જશે અને ખાવાની પણ બધાંને મજા આવી જશે. બજારની મિઠાઈઓ ગમે એટલી મોંઘી લાવો એ નુકસાન જ કરે છે. જ્યારે ઘરમાં બનેલી સ્વીટ્સ વધુ પણ ખવાય જાય તો નુકસાન નહીં કરે. આ ઘૂઘરા તમે 15 દિવસ સુધી સ્ટોર કરી શકશો અને તેમાં માવાની પણ જરૂર નહીં પડે. તો ચાલો જાણી લો રેસિપી.
સૌથી પહેલાં ઘૂઘરાનો લોટ બાંધવા માટે મેદો લેવો. તેમાં ચપટી મીઠું અને 3 ચમચી ઘી એડ કરો અને થોડું થોડું પાણી એડ કરી પુરી કરતાં થોડો કડક લોટ બાંધી દો. હવે લોટને ઢાંકીને સાઈડમાં મૂકી દો.
ઘૂઘરાનો મસાલો તૈયાર કરવાની રીત
હવે પેનમાં 4-6 ચમચી ઘી લઈને તેમાં સોજી 5 મિમિટ સુધી શેકીને કાઢી લો. હવે એ જ પેનમાં કાજુ, બદામ, પિસ્તા, કિશમિશ ધીમા તાપે શેકી લો અને પછી મિક્સરમાં અધકચરા વાટી લો. ત્યાર બાદ એ જ પેનમાં સૂકા નારિયેળની છીણને બે મિનિટ શેકી લો. હવે એક બાઉલમાં શેકેલી સોજી, નારિયેળની છીણ, દળેલી ખાંડ, બધાં ડ્રાયફ્રૂટ્સ, એલચી પાઉડર બધું નાખીને બરાબર મિક્સ કરી લો. આ મિશ્રણ છૂટું પડે એવું લાગે તો તેમાં 2-3 ચમચી દૂધ એડ કરી શકો છો. હવે ઘૂઘરાના લોટના લૂવા કરીને તેની પૂરી વણી લો. તેમાં 1 ચમચી સ્ટફિંગ એડ કરીને બજારમાં મળતા સંચાથી અથવા તો ફોકથી ડિઝાઈન કરીને સીલ કરી દો. સીલ કરતી વખતે પુરીની કિનારી પર સહેજ પાણી લગાવી દેવું. તમે લોટ કઠણ બાંધશો તો તેનું પડ કડક બનશે. હવે ગરમ તેલમાં મીડિયમ ગેસ પર ઘૂઘરા લાઈટ ગોલ્ડન તળી લો. તૈયાર છે એકદમ ટેસ્ટી અને મજેદાર દિવાળી સ્પેશિયલ ઘૂઘરાની મિઠાઈ.