ગુજરાતમાં ભાગ્યે જ કોઈ એવું ઘર હશે કે જેમાં દિવાળીએ મઠિયા ન બનતા હોય. આખુ વર્ષ મઠિયા ખવાય કે ન ખવાય, દિવાળીએ તો મઠિયા બને જ છે. મઠિયા કે એ ગુજરાતના લોકોને પ્રિય વાનગી છે, જે મઠના લોટમાંથી બનાવવામાં આવે છે. તો આજે અમે તમારા માટે ઘરે સરળતાથી બની જાય એવી મઠિયાની રેસિપી લઈને આવ્યા છે. આ રેસિપીથી મઠિયા બનાવશો તો એકદમ એકદમ ક્રિસ્પી અને ટેસ્ટી બનશે.
સૌથી પહેલાં મઠ અને અડદની દાળના લોટને ચાળીને બરાબર મિક્સ કરી દો. તેમાં લાલ મરચું પાઉડર, હળદર, ઘી નાંખી બરાબર મિક્સ કરી દો. હવે 2 કપ હૂંફાળુ પાણી લઈ તેમાં પાપડ ખારો, મીઠું, ખાંડ, મરી પાવડર અને અજમો ઉમેરો. ખાંડ ઓગળી જાય ત્યાં સુધી તેને મિક્સ કરતા રહો. હવે આ તૈયાર પાણી ઠંડુ થાય એટલે તેનાથી લોટ બાંધો. જરૂર પડે તો થોડુ બીજું પાણી ઉમેરી લો. લોટને 15-20 મિનિટ સુધી બરાબર બાંધો.
લોટ કઠણ બાંધવો. ત્યાર બાદ તેને લોખંડના દસ્તાથી ખાંડવો. સરસ એકસરખો થઈ જાય પછી તેને મસળીને વીંટાવાળી તેલવાળો હાથ કરીને નાના લૂવા કરી લો. ત્યારબાદ એકદમ પાતળા વણી નાંખો. મઠિયા તૈયાર થાય એટલે તળી લો. તમે આ મઠિયા 1 મહિના સુધી સ્ટોર કરીને ખાઈ શકો છો.