રોજ શું શાક બનાવવું એ દરેક ગૃહણીનો પ્રશ્ન હોય છે. એમાં પણ કેટલાક શાક ઘરના લોકોને ભાવતા નથી હોતા, જેમાંથી એક દૂધ પણ છે. જો તમારા ઘરે બધાં દૂધ નથી ખાતાં તો એકવાર અહીં જણાવેલ કાઠીયાવાડી રીતે દૂધી બટાકાનું શાક બનાવી જુઓ. આ ટેસ્ટફુલ શાક ઘરના બધાં જ માંગીને ખાશે અને તમે વારંવાર બનાવશો. આ શાક ઝટપટ બની જાય છે અને દૂધી સ્વાસ્થ્ય માટે પણ સારી હોવાથી ડાયટમાં સામેલ કરવી જોઈએ. તો ચાલો જાણી લો રેસિપી.
સૌથી પહેલાં દૂધ અને બટાકાને છોલીને બંનેના મીડિયમ નાના કટકા કાપી લો. હવે બંનેને સારી રીતે ધોઈને નિતારી લો. પછી કૂકરમાં 4 ચમચી તેલ લઈ તેમાં અડઘી ચમચી રાઈ, 1 ચમચી જીરું, ચપટી હીંગ, લસણ વાટીને નાખવું, પછી તેમાં 1 ચમચી લાલ મરચું નાખી 2 ચમચી પાણી નાખી લસણ સાંતળી લેવું. પછી તેમાં હળદર નાખી દૂધી અને બટાકા નાખી દેવા. 5 મિનિટ શાક સાંતળી તેમાં અડધી ચમચી લાલ મરચું વધારાનું ઉમેરવું. પછી મીઠું સ્વાદ મુજબ નાખવું. પછી તેમાં 1 ઝીણું સમારેલું ટામેટું નાખવું અને સાંતળવું. પછી તેમાં અડધો કપ પાણી નાખવું અને કૂકરનું ઢાંકણ બંધ કરી 3 સીટી વગાળી લેવી. પછી ઢાંકણ ખોલી તેમાં 1 ચમચી ધાણાજીરું પાઉડર, 1 ચમચી ગોળ અને કોથમીર નાખીને મિક્સ કરી લો. બસ તૈયાર છે દૂધી બટાકાનું રસાવાળું ચટાકેદાર શાક.