Healthy Recipe / ઘર-ઘરમાં ખવાતા મમરાને આપો હેલ્ધી અને ટેસ્ટી ટ્વિસ્ટ, આ રીતે બનાવશો તો દાઢે વળગશે સ્વાદ

સામગ્રી

2 કપ સાદા મમરા
1 કપ મખાણા
1/2 કપ કાજુ
1/2 સૂકું નારિયેળ (કટકા કરેલું)
1 કપ કાચી શીંગ
2 ચમચી મીઠો લીમડો
2 ચમચી કિસમિસ
1/2 ચમચી સંચળ
1/4 હીંગ
1/2 ચમચી લાલ મરચું
1/2 ચમચી હળદર
સાદું મીઠું જરૂર પ્રમાણે
1 ચમચી દળેલી ખાંડ (બુરું)
તેલ 4 ચમચી

રીત

સૌથી પહેલાં એક મોટી કડાઈ લઈશું. તેમાં 4 ચમચી તેલ નાખીશું, સહેજ ગરમ થાય એટલે તેમાં શીંગ નાખીને તળી લઈશું. શીંગ ક્રિસ્પી થાય થાય સુધી તળવી. પછી કાજુ નાખીને પણ સહેજ તળી લઈશું અને બંને સાઈડમાં કાઢી લઈશું. હવે બચેલાં તેલમાં સૂકા નારિયેળના ટુકડા નાખી સહેજ તળી લેવાં, પછી તેને પણ સાઈડમાં કાઢી લેવા. હવે એ જ તેલમાં મખાણા નાખી તેને પણ સહેજ શેકી લેવા અને કાઢી લેવા. આ બધું ધીમી આંચ પર જ શેકવું. હવે કડાઈમાં 1 ચમચી તેલ નાખી તેમાં હીંગ, હળદર, લીમડો નાખી ધીમી આંચ પર શેકવું, પછી તરત તેમાં મમરા નાખો અને ધીમી આંચ પર 5 મિનિટ શેકો. પછી તેમાં લાલ મરચું, બુરું, સંચળ નાખી બરાબર મિક્સ કરી લેવું. હવે ક્રિસ્પી થાય ત્યાં સુધી શેકવું. પછી તેમાં શીંગ, કિસમિસ, મખાણા, કાજુ બધું નાખી બરાબર મિક્સ કરી શેકી લેવું અને 5 મિનિટ પછી ગેસ બંધ કરી દેવો. તૈયાર છે હેલ્ધી, ટેસ્ટી અને ક્રિસ્પી મમરાની રેસિપી. પોતે પણ ખાઓ અને મહેમાનોને પણ ખવડાવો.