રેસિપી / દેશી ચણાનું મસાલેદાર અને ખાટું મીઠું આ ગુજરાતી શાક બધાંને ખૂબ જ ભાવશે, ફટાફટ આ રેસિપીથી બનાવી લો

સામગ્રી

1 કપ કાળા ચણા
અડધી ચમચી લાલ મરચું
અડધી ચમચી હળદર
1 ચમચી ધાણાજીરું પાઉડર
1 ચમચી અમચૂર પાઉડર
અડધી ચમચી શેકેલા જીરાનો પાઉડર
2 ડુંગળી
2 ટામેટાં
1 ઈંચ આદુ
5 કળી લસણ
તેલ
1 ચમચી ગોળ
અડધી ચમચી ગરમ મસાલો

રીત

ચણાને આખી રાત પાણીમાં પલાળી દો. હવે ચણાને બાફવા 3 કપ પાણી એડ કરીને તેમાં થોડું મીઠું એડ કરી મિક્સ કરી લો. પછી 6-7 સીટી વગાડી લો. 
હવે એક વાટલીમાં અડધી ચમચી લાલ મરચું, અડધી ચમચી હળદર, 1 ચમચી ધાણાજીરું પાઉડર, 1 ચમચી અમચૂર પાઉડર, અડધી ચમચી શેકેલા જીરાનો પાઉડર લઈ તેમાં 3 ચમચી પાણી નાખી પેસ્ટ બનાવી લો. હવે મિક્સમાં 2 ડુંગળીના કટકા નાખી તેમાં 1 ટુકડો આદુ, 5 લસણની કળી અને 2 ટામેટાં નાખીને પેસ્ટ તૈયાર કરી લો. હવે ચણા બફાઈ જાય પછી એક કડાઈમાં 5 ચમચી તેલ લઈ તેમાં અડધી ચમચી જીરૂં, 3 લવિંગ, 1 લાલ આખું મરચું, 1 તમાલપત્ર, 1 ઈંચ તજનો ટુકડો તેલમાં નાખી સાંતળી લો. હવે તેમાં ચપટી હીંગ નાખી 1 ચમચી ચણાનો લોટ નાખી દેવો. તેનાથી ગ્રેવી થિક થાય છે. પછી તેમાં મસાલાની પેસ્ટ નાખી સાંતળી લેવું. પછી તેમાં ટામેટાની પેસ્ટ નાખીને મસાલો બરાબર મિક્સ કરી સાંતળી લેવો. તેલ છૂટું પડે એટલે તેમાં સ્વાદ પ્રમાણે મીઠું નાખી દેવું, પછી તેમાં બાફેલાં ચણા પાણી સાથે નાખી દેવા. પછી 10 મિનિટ ગ્રેવીમાં ચણા કૂક કરવા. છેલ્લે શાકમાં અડધી ચમચી ગરમ મસાલા પાઉડર, અડધી ચમચી આમલીનો પલ્પ અને 1 મોટી ચમચી ગોળ નાખી 10 મિનિટ શાક થવા દેવું. બસ તૈયાર છે તમારું ચણાનું ખાટુ મીઠું ચટાકેદાર શાક.