મોસ્કો પોલીસને હાલમાં શહેરથી 80 કિમી દૂર વેરાન જંગલમાં ઝાડ સાથે બાંધેલું હાડપિંજર મળ્યું. તપાસમાં સામે આવ્યું કે આ હાડપિંજર ઇવાન ક્લુસારેવનું છે, જે છેલ્લે મોસ્કોમાં જ બે વર્ષ પહેલાં જોવા મળ્યો હતો. ત્યારબાદ ન તો કોઇને ઇવાનની જાણ હતી કે ન તો પોલીસ તેને શોધી શકી.
રશિયન પોલીસનું કહેવું છે કે ઇવાન હાઇકિંગ અને સર્વાઇવલ સ્કિલનો અનુભવી હતો. આ બહાને તે એવા કરતબ બતાવવા ઇચ્છતો હતો, જે તેને બીજાઓ સામે મહાન સાબિત કરે. પોલીસના જણાવ્યા મુજબ આ કોશિશમાં તેણે શતુરાનાં સૂમસામ જંગલોમાં ખુદને ચેન અને તાળાં દ્વારા ઝાડ સાથે બાંધી લીધો હતો. બાદમાં તે પોતાને ખોલવામાં નિષ્ફળ ગયો, કેમ કે જે જગ્યાએ ઇવાનની લાશ મળી ત્યાંથી કોઇ પસાર થતું નથી. તેથી કોઇને તેની જાણ ન થઇ.
પોલીસને ઘટનાસ્થળની સામે એક ટેન્ટ અને ઝાડની સામે લાગેલો એક કેમેરા પણ મળ્યો. એવું માનવામાં આવે છે કે ઇવાન ખુદની જાદુગરીનો રેકોર્ડ કરીને બતાવવા ઇચ્છતો હતો. આ ઉપરાંત પાંચ હાથકડી, કેટલીક લોખંડની ચેન, તાળું અને પુસ્તકો પણ મળ્યાં. રશિયાની ઇન્વેસ્ટિગેટિવ કમિટીએ જણાવ્યું કે એ તો નક્કી જ છે કે ઇવાન એ ગ્રૂપનો ભાગ છે, જે કઠિન પરિસ્થિતિમાં પોતાની સર્વાઇવલ સ્કિલ્સનું પરીક્ષણ કરે છે.
યુવકના મોતનું કારણ ફોરન્સિક તપાસમાં સામે આવવાની શક્યતા છે. હાલમાં પોલીસ કોઇ પણ પરિણામ પર ન પહોંચીને કેમેરાની મેમરી અને તેના કમ્પ્યૂટરની તપાસ કરી રહી છે.
લાશને શોધનાર સ્થાનિક નિવાસીએ જણાવ્યું કે સૌથી પહેલાં તેને ઝાડ પર બાંધેલી હુડીમાં ઇવાનની ખોપરી જોવા મળી. તેનું હાડપિંજર માત્ર ઝાડનાં પાંદડાંથી ઢંકાયેલું હતું. ઇવાનનું નામ ગુમ થયેલા લોકોની યાદીમાં હતું. આ પહેલાં પણ શતુરનાં જંગલમાં તેને શોધવાની તમામ કોશિશ નાકામ થઇ ચૂકી હતી.