શિવરાત્રિના દિવસે શિવજીને ઠંડાઈ કે ભાંગનો ભોગ લગાવવાથી તેઓ પ્રસન્ન થાય છે. તો જાણો ઠંડાઈ બનાવવાની રેસિપી.
શિવરાત્રિના દિવસે શિવજીને ચઢાવો ખાસ ભોગ
ઘરે બનાવી લો સરળ રીતે ઠંડાઈ
ભોલેનાથ થશે પ્રસન્ન
ઠંડાઈને દેશી એનર્જી ડ્રિંક માનવામાં આવે છે. તેમાં ઉપયોગમાં લેવાતી ચીજો તેને સ્વાદિષ્ટ બનાવે છે અને શરીરને પોષણ આપે છે. તો જાણો ઘરે સરળતાથી ઠંડાઈ કઈ રીતે બનાવી શકાય તે વિષે.
સામગ્રી
બદામ- 50 ગ્રામ
ખસખસ-30 ગ્રામ
તરબૂજના બીજ છોલેલા - 20 ગ્રામ
ટેટીના છોલેલા બીયા- 20 ગ્રામ
કાકડીના બીજ- 20 ગ્રામ
વરિયાળી - 50 ગ્રામ
કાળા મરી -10 ગ્રામ
દેશી ગુલાબની પાંદડીઓ- 20 ગ્રામ
ગુલકંદ- 1 ચમચી
નાની એલચી - 5 નંગ
મુનક્કા બીજ વિનાના -8 નંગ
મિસરી -100 ગ્રામ
દૂધ - 1 લિટર
ઠંડાઇ બનાવવાની રીત
બદામ, ખસખસ, તરબૂજના બીજ, કાકડીના બીજ, ગુલાબના પાન, વરિયાળી, કાળા મરી, એલચી, મુનક્કાને 5-6 કલાક પલાળીને રાખો, સવારે બદામના છોતરા કાઢી લો અને પાણી સાથે જ તમામ સામગ્રી પીસી લો. જો ખલમાં પીસો તો સારું. નહીં તો ગ્રાઈન્ડરમાં ક્રશ કરી લો.
હવે એક તપેલીમાં દૂધમાં મિસરી મિક્સ કરો અને સાથે જ તેને ઉકાળો અને ઠંડુ કરો. હવે તેમાં પીસેલી સામગ્રી મિક્સ કરો અને તેમાં 1 ગ્લાસ પાણી ઉમેરો. સાફ કપડા કે ગળણીની મદદથી તેને ગાળી લો. થોડું થોડું પાણી ઉમેરો અને ગાળતા રહો. પીસેલી સામગ્રીનો કસ પાણીની સાથે કાઢો. આ બધું લગભગ 2 ગ્લાસ જેટલું થશે. ગાળેલા પાણીમાં દૂધ મિક્સ કરો. તમારી પાસે 6 ગ્લાસ ઠંડાઈ તૈયાર થશે. તેમાં બરફ મિક્સ કરો. ઠંડી અને સ્વાદિષ્ટ ઠંડાઈની મજા માણી શકશો અને ભોગ પણ ચઢાવી શકશો.