તમારા કામનું / બેંક લોકરમાં મુકેલા દાગીનાની ચોરી થવાની ચિંતા છોડો! આ રીતે મેળવો ઈંશ્યોરન્સ કવરનો લાભ, જાણો ડિટેલ્સ

• બેન્ક લોકરના દાગીનાની ચિંતા છોડો
• વીમા કંપની આપે છે વીમા કવચ
• જાણો કઈ રીતે મેળવશો તેનો લાભ 

સોનાના રોકાણને સૌથી વધુ પસંદગીનું અને સલામત રોકાણ માનવામાં આવે છે. આજે પણ મોટી સંખ્યામાં લોકો સોનાના દાગીનામાં રોકાણ કરવાનું પસંદ કરે છે. સોનાના દાગીના ખરીદ્યા પછી, લોકોએ તેને સુરક્ષિત રાખવા માટે બેંક લોકરનું ભાડું પણ ચૂકવવું પડે છે.

લોકરનું ભાડું ચૂકવ્યા પછી પણ બેંકો આપણા સામાનને 100% સુરક્ષિત રાખવાની ખાતરી આપતી નથી. ઘણી વખત બેંકમાં ચોરીના કિસ્સામાં બેંકો ખોવાયેલા દાગીના જેટલી રકમ આપતી નથી કારણ કે બેંક કહે છે કે તેઓને બેંકના લોકરમાં મુકેલા સામાન વિશે માહિતી હોતી નથી. આવી સ્થિતિમાં તમારી જ્વેલરીને સુરક્ષિત રાખવા માટે તમે તેના પર વીમા કવર લઈ શકો છો.

જ્વેલરીનો કરાવો વીમો
ગ્રાહકોની આવી ચિંતાઓને દૂર કરવા માટે વીમા કંપનીઓ મોંઘા દાગીના પર વીમા કવચ ઓફર કરે છે. આવી સ્થિતિમાં દાગીનાની ચોરીના કિસ્સામાં તમને તેનું સંપૂર્ણ કવર મળે છે. જ્વેલરી પર વીમા કવચ મેળવવા માટે તમે 2 પ્રકારની પોલિસી ખરીદી શકો છો. પ્રથમ હોમ ઇન્શ્યોરન્સ પોલિસી અને બીજી સ્ટેન્ડ-અલોન જ્વેલરી પોલિસી.

હોમ ઇન્શ્યોરન્સ પૉલિસીના નામ પ્રમાણે તે તમારા ઘરમાં રાખેલી જ્વેલરી માટે વીમા કવચ આપે છે. જો તમારા ઘરમાં ચોરી કે લૂંટ થાય છે તો પોલિસીધારકને તમામ દાગીનાનું વીમા કવચ મળે છે. બીજી બાજુ સ્ટેન્ડ-અલોન જ્વેલરી પોલિસી દ્વારા તમે ઘરેથી બેંક લોકર સુધીના ઘરેણાં પર વીમા કવચ મેળવી શકો છો.

ચૂકવવું પડશે આટલું પ્રીમિયમ 
જો તમે તમારી જ્વેલરીને ઘરથી લઈને બેંક સુધી સુરક્ષિત રાખવા માંગો છો તો તમે સ્ટેન્ડઅલોન જ્વેલરી વીમા પોલિસી ખરીદી શકો છો. હવે સૌથી મોટો પ્રશ્ન એ છે કે આ પોલિસી માટે તમારે પ્રીમિયમ તરીકે કેટલા પૈસા જમા કરાવવાના રહેશે. 

સ્ટેન્ડઅલોન જ્વેલરી વીમા પૉલિસીમાં રૂ. 10 લાખનો વીમો મેળવવા માટે, તમારે દર મહિને રૂ. 1,000 અને વાર્ષિક 12,000નું પ્રીમિયમ ચૂકવવું પડશે. જો આ પોલિસી ખરીદ્યા પછી તમારી જ્વેલરી ચોરાઈ જાય છે, તો તમને તેના માટે સંપૂર્ણ ક્લેમ મળી જશે. 

જ્વેલરીની માર્કેટ વેલ્યુએશન કરવી છે જરૂરી 
ઈન્સ્યોરન્સ પોલિસી ખરીદતા પહેલા તમારે એક વાત ધ્યાનમાં રાખવી જોઈએ કે તમારી જ્વેલરી કંપની  સોનાનું માર્કેટ વેલ્યુએશન ઓછું ન લગાવી દે. કેટલીકવાર વીમા કંપનીઓ જ્વેલરીની કિંમત ઓછી લગાવી લે છે. 

આવી સ્થિતિમાં જ્યારે પોલિસીનો ક્લેમ કરવાનો સમય આવે છે. ત્યારે ગ્રાહકને દાગીનાની યોગ્ય કિંમત મળતી નથી. આવી સ્થિતિમાં સ્ટેન્ડઅલોન જ્વેલરી વીમા પૉલિસી લેતી વખતે ઘરેણાંની યોગ્ય માર્કેટ વેલ્યુએશન કરી લો.