શિયાળો એટલે હેલ્ધી ખોરાક ખાવાની સિઝન. ખાસ કરીને આ સિઝનમાં લોકો જુદા-જુદા વસાણાં ખાતા હોય છે. જેથી સ્વાસ્થ્ય આખું વર્ષ ટકી રહે. જેમાંથી મેથી પાક પણ ખૂબ જ હેલ્ધી વસાણું છે. પરંતુ મેથીની કડવાશને કારણે ઘણાં લોકોને મેથી પાક ભાવતો નથી. પણ આજે અમે તમને એવી જોરદાર રીત જણાવીશું, જેનાથી તમને મેથી પાક જરાય કડવો નહીં લાગે અને મોટાઓ અને બાળકો બધાં જ માંગીને ખાશે. તો ચાલો જાણી લો.
સૌથી પહેલાં મેથીને 1 કપ દૂધમાં આખી રાત પલાળી સવારે નિતારીને તેને પાણી વિના મિક્સમાં ક્રશ કરી લો. પછી એક કડાઈમાં 1 ચમચી ઘી લઈ તેમાં મેથી શેકી લો અને પછી 1 ચમચી વધુ ઘી લઈ ગૂંદર તળી લો અને ઠંડુ થાય એટલે ક્રશ કરી લો. પછી એ જ કડાઈમાં 2 ચમચા ઘી લઈ અડદનો લોટ લોટ 2 મિનિટ શેકો, પછી તેમાં ઘઉંનો લોટ ઉમેરી 5 મિનિટ શેકો અને પછી તેમાં ચણાનો કકરો લોટ ઉમેરી ગોલ્ડન થાય બધાં લોટ ત્યાં સુધી શેકો. ઘી ઓછું લાગે તો 2 ચમચી ઘી વચ્ચે મિક્સ કરી દો. હવે ગેસ બંધ કરી લોટ, મેથી, ગૂંદર બધું મિક્સ કરી તેમાં સૂંઠ, ગંઠોળા, નારિયેળની છીણ, કાટલું પાઉડર, ડ્રાયફ્રુટ્સ, અડઘી ચમચી એલચી પાઉડર નાખી બધું બરાબર મિક્સ કરી લો. હવે એક અન્ય કડાઈમાં 2 ચમચી ઘી લઈ તેમાં કતરેલો ગોળ નાખી ઓગળે એટલો પકાવો. ગોળ ઓગળે એટલે તેમાં બધું મિશ્રણ નાખીને બરાબર મિક્સ કરી લો અને થાળીમાં પાથરીને પીસ કરી લો. તૈયાર છે હેલ્ધી મેથી પાક.