બોમ્બે હાઈકોર્ટે એક મહત્વનો ફેંસલો આપતા એવું કહ્યું કે હોઠ પર કીસ અને શારીરિક અંગોનો સ્પર્શ કરવો ભારતીય દંડ સંહિતા (આઈપીસી)ની કલમ 377 હેઠળ અકુદરતી શ્રેણીનો ગુનો નથી. સગીર છોકરાના જાતીય શોષણના આરોપીને જામીન આપતી વખતે બોમ્બે હાઈકોર્ટે આવું અવલોકન કર્યું હતું. બોમ્બે હાઈકોર્ટના જસ્ટિસ પ્રભુદેસાઈએ કહ્યું કે હાલના કેસમાં અપ્રાકૃતિક સેક્સનું તત્વ પ્રથમ દૃષ્ટિએ જણાતું નથી.
Bombay HC grants bail to POCSO accused, says kissing prima facie not unnatural sex
હોંઠ પર ચૂંબન અને શારીરિક સ્પર્શ અકુદરતી ગુનો નથી- હાઈકોર્ટ
તેમણે કહ્યું, "પીડિતાનું નિવેદન તેમજ ફર્સ્ટ ઇન્ફર્મેશન રિપોર્ટ (એફઆઈઆર) પ્રથમ દ્રષ્ટિએ સૂચવે છે કે અરજદારે પીડિતાના ખાનગી ભાગોને સ્પર્શ કર્યો હતો અને તેના હોઠ પર ચુંબન કર્યું હતું, પરંતુ મારા મતે તે ભારતીય દંડ સંહિતાની કલમ 377 હેઠળ પ્રથમ દર્શનીય ગુનો નથી. હાઈકોર્ટે વધુમાં જણાવ્યું હતું કે, આરોપી પહેલાથી જ એક વર્ષથી કસ્ટડીમાં છે અને આ કેસમાં સુનાવણી હજુ ટૂંક સમયમાં શરૂ થાય તેવી શક્યતા નથી. જસ્ટિસ પ્રભુદેસાઈએ આરોપીને 30,000 રૂપિયાના પર્સનલ બોન્ડ પર જામીન આપતા કહ્યું કે, "ઉપરોક્ત તથ્યો અને સંજોગોને ધ્યાનમાં રાખીને અરજદાર જામીન મેળવવા માટે હકદાર છે.
આરોપીએ સગીરના હોંઠ પર કીસ કરીને પ્રાઈવેટ પાર્ટનો સ્પર્શ કર્યો હતો
મુંબઈમાં છોકરાના પિતાને તેના કબાટમાંથી કેટલાક પૈસા ગાયબ હોવાનું જાણવા મળ્યું હતું. આ અંગે પિતાએ તેના સગીર છોકરાને પૂછ્યું હતું ત્યારે તેણે પેટ છૂટ વાત કરતા જણાવ્યું હતું કે તેણે કબાટમાંથી પૈસાની ચોરી કરી હતી અને ચોરાયેલા પૈસાનો ઉપયોગ ઓનલાઇન ગેમ, 'ઓલા પાર્ટી' રિચાર્જ કરવા માટે કરતો હતો. છોકરાએ આરોપ લગાવ્યો કે એક દિવસ જ્યારે તે રિચાર્જ કરવા ગયો, ત્યારે આરોપીએ તેના હોઠ પર ચુંબન કર્યું અને તેના ગુપ્તાંગને સ્પર્શ કર્યો. છોકરાએ ઘેર આવીને તેના પિતાને આ વાતની જાણ કરી હતી, ત્યાર બાદ પિતાએ ચિલ્ડ્રન ફ્રોમ સેક્સ્યુઅલ ઓફેન્સિસ (પોક્સો) એક્ટ અને ભારતીય દંડ સંહિતા (આઈપીસી) ની કલમ 377 ની સંબંધિત કલમો હેઠળ એફઆઈઆર નોંધાવી હતી.
આઈપીસીની કલમ 377 હેઠળ મહત્તમ સજા આજીવન કારાવાસ
આઈપીસીની કલમ 377 હેઠળ મહત્તમ સજા આજીવન કારાવાસની છે અને આ કેસમાં જામીન આપવા મુશ્કેલ છે પરંતુ ન્યાયાધીશ પ્રભુદેસાઈએ આરોપીને જામીન આપતા કહ્યું કે છોકરાની તબીબી તપાસમાં તેના યૌન શોષણના આરોપોની પુષ્ટિ થતી નથી. જસ્ટિસ પ્રભુદેસાઈએ વધુમાં કહ્યું કે, આરોપી સામે લગાવવામાં આવેલી પોક્સોની કલમોમાં વધુમાં વધુ 5 વર્ષની સજા થઈ શકે છે, તેથી તેને જામીન મેળવવાનો અધિકાર છે.