VTV વિશેષ / LIVEમાં પતંગ કપાઈ જતાં કીર્તીદાન ગઢવીએ કહ્યું-જે કાપે એની પણ જશે, ગીતાબેન-કિંજલે આપ્યો ખાસ મેસેજ

• રાજ્યભરમાં ઉત્તરાયણના તહેવારની ઉજવણી 
• લોકગાયક અને પ્લેબેક સિંગર કિર્તીદાન ગઢવી અમદાવાદમાં
• ગીતા રબારીએ ગીતો ગાઈ કરાવી મોજ 
• કિંજલ દવેએ ચાઈનીઝ દોરીનો ઉપયોગ ટાળવા લોકોને સંદેશો આપ્યો

આજે રાજ્યભરમાં ઉત્તરાયણના તહેવારની ઉજવણી થઈ રહી છે ત્યારે ગુજરાતનાં પ્રખ્યાત ગાયક કલાકારો પણ પોતાના પરિવાર સાથે ધાબે ચડ્યાં છે. કલાકારોએ VTV સાથેની ખાસ વાતચીતમાં લોકોને શુભેચ્છા પાઠવી અને પોતાના મધુર અવાજથી ગીતો ગાઈ લોકોનાં તહેવારને વધુ ખાસ બનાવ્યાં છે. 

ગીતમાં મશગૂલ કિર્તીદાનની પતંગ પણ કપાઈ !
આકાશમાં પક્ષીઓનું જતન કરવું અને તેમને નુક્સાન ન થાય તેની ખાસ તકેદારી રાખવું જોઈએ. સરકારની સૂચના મૂજબ ચાઈનીઝ દોરીનો બહિષ્કાર કરવો જોઈએ કારણકે તે જીવલેણ દોરી છે. તેથી ભારતમાં આખી દુનિયાને બાંધી શકે તેવી મજબૂત દોરી છે તો ચાઈનીઝ દોરીનો ત્યાગ કરવો જોઈએ. રાજકોટમાં આખું સૌરાષ્ટ્ર રહે છે તો અમદાવાદમાં આખું ગુજરાત રહે છે. તો આજે આખા ગુજરાત સાથે ઊત્તરાયણનો તહેવાર મનાવતો હોઉં એવું લાગી રહ્યું છે. આમ કિર્તીદાને પોતાના દર્શકો માટે ગીતો ગાયા તો બીજી તરફ ગીતમાં મશગૂલ કિર્તીદાનની પતંગ પણ કપાઈ ગઈ!

દિલ કી પતંગ દેખો ઊડી-ઊડી જાય, ગીતા રબારીએ કરાવી મોજ
ગીતાબેન રબારી પોતાના પરિવાર સાથે ઉત્સાહપૂર્વક તહેવારની ઊજવણી કરી રહ્યાં છે. ગીતાબેને લોકોને ઉત્તરાયણની શુભેચ્છા આપતાં લોકોને વિનંતી કરી કે સાવચેતીથી ઉત્તરાયણ મનાવો અને ચાઈનીઝ દોરીનો ઉપયોગ ન કરી 'લોકલ ફોર વોકલ' ને સપોર્ટ કરીએ. ગીતા રબારીએ કહ્યું કે ચાઈનીઝ દોરીથી વાહન ચાલકો અને પક્ષીઓને નુક્સાન થાય છે. આપણી મોજ કોઈ માટે સજા ન બને તેનું ધ્યાન રાખવું જોઈએ. સવારે 10-11 વાગ્યા પછી પતંગ ચગાવીએ જેથી પક્ષીઓ પણ પોતાના માળામાં જતાં રહે. ગીતા રબારીએ પણ પોતાના દર્શકો માટે ગીતો ગાઈ વાતાવરણ આનંદમય બનાવ્યું હતું.

મોજમાં રે મોજમાં રહેવાનું ભાઈ મોજમાં- કિંજલ દવે
લોકગાયિકા કિંજલ દવેએ કહ્યું કે કોરોનાકાળ બાદ આ વર્ષે મોકો મળ્યો છે તે ટાઈમને લોકોએ ભરપૂર માણવો જોઈએ, પતંગ ચગાવી પરિવાર અને મિત્રો સાથે એન્જોય કરવું. કિંજલ દવેએ પોતાના શ્રોતાઓને ગીત ગાઈને મોજમાં રહેવાનો સંદેશો આપ્યો છે. આ સાથે જ લોકોને સંદેશો આપતાં ચાઈનીઝ દોરીનાં ઉપયોગ ન કરવા પર કહ્યું કે આપણી આસપાસનાં પક્ષીઓ અને પર્યાવરણનું ધ્યાન રાખવું એ આપણાં સૌની જવાબદારી છે. સૌએ તહેવારની મજા લેવી જોઈએ પરંતુ ચાઈનીઝ દોરીનો ઉપયોગ ન કરીને સાવચેતીથી ઉત્સવ ઊજવવો જોઈએ.