રાજા બધી જગ્યાએ રાજા જ હોય છે, પછી તે કુદરતી જંગલ હોય કે પછી કોંક્રિટનું જંગલ હોય. હાલમાંજ એક વીડિયો વાયરલ થઈ રહ્યો છે જેમાં સિંહ એક શહેરમાં જાણે લટાર મારવા નીકળ્યો હોય તેવું જણાઈ રહ્યુ છે અને લટાર મારતા મારતા સિંહ એક હોટલમાં ઘુસી ગયો છે અને ત્યાંથી પણ શાંતિથી નીકળી રહ્યો છે. જેનો વીડિયો સોશિયલ મીડિયા પર ચર્ચાનો વિષય બન્યો છે.
હોટલમાં ઘુસ્યો જંગલનો રાજા
સોશિયલ મીડિયામાં થઈ રહી છે ચર્ચા
કહેવાય છે વીડિયો જુનાગઢની એક હોટલનો છે
સિંહે ગેટ ખુલવાની રાહ ના જોઈ
વીડિયોમાં જોવા મળે છે કે સિંહ કોઈ એક હોટલમાં ઘુસી ગયો છે અને ત્યાંથી બહાર નીકળવાનો પ્રયાસ કરી રહ્યો છે. પણ હોટલની બહાર નીકળવા માટે કોઈ સીધો રસ્તો નથી જોવા મળી રહ્યો હોટલનો ગેટ સિક્યોરિટી ગાર્ડેં બંધ કરી રાખ્યો છે અને થોડો સમય સિંહ બહાર કેવી રીતે જવુ તેની અવઢવમાં છે પણ સિંહ થોડી સિક્યોરિટી ગાર્ડની ગેટ ખોલવાની રાહ જોવાનો છે. સિંહે તો સિક્યોરિટી ગાર્ડની રાહ જોયા વગર જે કર્યું તે જોવા જેવુ છે.
સિક્યોરિટી ગાર્ડ આશ્ચર્યમાં મુકાયો
એક યુઝરે ટ્વીટર પર સિંહનો વીડિયો શેર કર્યો, જેમાં જોવા મળે છે કે સિંહ પહેલા આરામથી હોટલનાં ગેટ પાસે આવે છે અને પછી સિક્યોરિટી ગાર્ડને કોઈ હેરાનગતિ થાય નહીં તેનું ધ્યાન રાખીને હોટલ બહાર જવા માટે ગેટ ખુલવાની રાહ જોયા વગર ગેટ પરથી છલાંગ લગાવીને હોટલ બહાર લટાર મારવા નીકળી જાય છે. આ દૃશ્ય જોઈને ગેટનો સિક્યોરિટી ગાર્ડ પણ સફાળો જાગી જાય છે અને જુએ છે કે આ શું બની ગયું.
ઘટનાનું સ્થળ હજુ અકબંધ
આ ઘટનાનો વીડિયો પરીમલ નથવાણીએ પણ ટ્વીટર પર શેર કર્યો છે અને વીડિયો શેર કરતા તેમણે કહ્યું કે, આ ઘટના ગુજરાતનાં જુનાગઢની પાસેનાં સરોવર પોર્ટીકો હોટલની છે. તેમણે લખ્યું કે જંગલનો રાજા સિંહ અહીં ફરવા આવ્યો પણ કોઈને ઈજા નથી પહોંચાડી. જોકે હજુ સુધી એ ખબર નથી પડી રહી કે આ વીડિયો અસલમાં કઈ જગ્યાનો છે. પણ એ ખ્યાલ આવી રહ્યો છે કે જંગલોનો નાશ આ પ્રાણીઓ પર કેવી અસર પાડી રહ્યો છે.