પોતાના માથા ઉપરનો કરજ ચુકવવા માટે પંજાબમાં એક સ્ત્રી પોતાના જ પતિની હત્યાની સોપારી આપવા તૈયાર થઇ ગઈ. ત્યાર બાદ એક આશ્ચર્યજનક ઘટનાક્રમમાં સોપારી લેનાર હત્યારાને તેના પતિની દયા આવી જતા તેણે પોલીસને જાણ કરી દીધી અને આ મહિલાની ધરપકડ કરવામાં આવી.
પંજાબના અમૃતસરમાં એક આશ્ચર્યજનક અને માનવામાં ન આવે એવો કિસ્સો સામે આવ્યો છે. અહીં એક સ્ત્રીએ પોતાના પતિને જીવથી મારી નાખવા માટે એક હત્યારાને સોપારી આપી હતી પરંતુ અહીં પાસા પલટાઈ ગયા હતા કારણ કે સોપારી લેનાર કિલરનું હૃદય પરિવર્તન થઇ ગયું હતું. તેણે તે સ્ત્રી પતિને તો ન જ માર્યો પરંતુ તેણે પોતાના એક મિત્રને આ વાત જણાવી દીધી. ત્યાર બાદ આ સમગ્ર મામલો પોલીસ પાસે પહોંચ્યો અને અત્યારે તે સ્ત્રીની પોલીસે ધરપકડ કરી છે અને અત્યારે તે જેલના સળિયા ગણી રહી છે.
દેવું ચુકવવા હત્યાનો પ્લાન
મળેલ અહેવાલ પ્રમાણે આ સ્ત્રીનું નામ નરિન્દર કૌર ડુવારા છે. તેના પતિનું નામ બક્ષિસ છે. બક્ષિસ એક સરકારી કર્મચારી છે. નરિન્દરના માથે મોટા પ્રમાણમાં દેવું હતું. તે આ દેવું ચૂકવવા માંગતી હતી પરંતુ તેનો પતિ તેને પૈસા આપતો નહોતો. આ માટે નરિન્દરે તેના એક મિત્ર સાથે મળીને બક્ષિસની હત્યા કરવાની યોજના બનાવી. એવું કહેવાય છે કે જે મિત્ર સાથે મળીને તેણે હત્યાની યોજના બનાવી હતી તે તેનો બોયફ્રેન્ડ હતો.
નરિન્દરની યોજના એવી હતી કે જો બક્ષિસની મોત થઇ જાય તો તે બક્ષિસની સંપત્તિ કબજે કરી લે અને તેના વડે તેનું દેવું ઉતારી શકે. આ યોજનાને પર પાડવા માટે નરિન્દરે એના મિત્ર અથવા બોયફ્રેન્ડને સોપારી આપી હતી. પરંતુ આ મિત્રને જયારે આ યોજનાના હેતુ અને બક્ષિસ વિષે જાણ થઇ ત્યારે તેનું હૃદય પરિવર્તન થઇ ગયું. તેણે આ મામલે તેના એક દોસ્તનો સંપર્ક કર્યો જેણે તેને સલાહ આપી કે જો આ બાબતે તાત્કાલિક પગલા ન લેવાયા તો એક નિર્દોષ વ્યક્તિ જીવ ખોઈ બેસશે. તેના દોસ્તે આ ઘટનાની પોલીસને જાણ કરી.
પોલીસની આ ફરિયાદ મળતા તરત જ તેમણે નરિન્દર અને તેના બોયફ્રેન્ડની ધરપકડ કરી. પોલીસ પાસે એક ઓડિયો ક્લિપ પણ છે જેમાં નરિન્દર પોતાના પતિની સોપારી આપતી સંભળાય છે. આ મામલે પોલીસ તાપસ ચાલુ છે પરંતુ મહત્વનું એ છે કે બક્ષિસ સુરક્ષિત છે.