માનવજાતને શર્મસાર કરતી ઘટના સામે આવી છે. એક શિક્ષકને દેવાની વસૂલી માટે કિડની વેચવા મજબૂર કરાયો હોવાની ચોંકાવનારી વિગતો સામે આવી છે. આ કોઈ સાઉથની ફિલ્મની કહાણી નથી પણ બનાસકાંઠાના થરાદ ગામના એક કમનસીબ શિક્ષકની જીવનકથની છે.
એક કિડની વેચવા બદલ 15 લાખ
વ્યાજખોરોના ચંગુલમાંથી બચવા આખરે પોલીસ શરણે
આતંરાષ્ટ્રીય ક્ષેત્રે ફેલાયેલું છે કિડની રેકેટ
બનાસકાંઠાના થરાદમાં કિડની કૌભાંડ સામે આવ્યુ છે. બનાસકાંઠા પોલીસ તપાસમાં બહાર આવ્યું છે કે કિડની કૌભાંડના તાર તેલંગાણા અને આંધ્રપ્રદેશ સાથે પણ જોડાયેલા છે. ગુજરાતના શિક્ષક ઉપરાંત આ રાજ્યોના કેટલાક લોકોએ શ્રીલંકાના એક ડોક્ટર સાથે પોતાની કિડનીનો સોદો કર્યો હતો. એક વ્યાજખોર પાસેથી રુપિયા લઈ ફસાયેલા રાજાજી રાવત (ઉ. વ. 35) એ તેને ચૂકવવા માટે બીજા વ્યાજખોર પાસેથી 5 લાખ રુપિયા લીધા હતા. જો કે આ રકમ પણ તે પરત આપી શકે તેમ નહોતો. તેવામાં તેણે પોતાની એક કિડની વેચવાનું નક્કી કર્યું હતું. ઈન્ટરનેટ પર તેણે આ અંગે સર્ચ કરતા તેનો સંપર્ક ડૉ. મોનિક સંજીવા સાથે થયો હતો, જે કોલંબોનો હતો.
એક કિડની વેચવા બદલ 15 લાખ
માર્ચ 2014મમાં રાજાજી રાવત કોલંબો ગયો હતો, અને ત્યાં ડૉ. સંજીવાએ જ તેના માટે નવલોકા હોસ્પિટલ નજીક રોકાવાની વ્યવસ્થા કરી હતી. રાજાજીને પોતાની એક કિડની વેચવા બદલ 15 લાખ રુપિયા અપાયા હતા. ભારત પરત ફરેલા રાજાજીએ બંને વ્યાજખોરોને રુપિયા ચૂકવી દીધા હતા. જો કે તેટલાથી સંતોષ ના થતાં તેમણે રાજાજી પાસેથી ઉઘરાણી ચાલુ રાખી હતી.
વ્યાજખોરોના ચંગુલમાંથી બચવા આખરે પોલીસ શરણે
વ્યાજખોરો પાસેથી લીધેલા રુપિયા કરતા પણ વધુ ચૂકવણી કર્યા બાદ પણ તેમણે ઉઘરાણી ચાલુ રાખી હતી. જેનાથી આખરે ત્રાસી ગયેલા રાજાજીએ પોલીસ ફરિયાદ કરી હતી. પોલીસે હર્ષ ભાટી અને દેવા રબારી નામના બે વ્યાજખોરોની આ મામલે ધરપકડ કરી છે.
આતંરાષ્ટ્રીય ક્ષેત્રે ફેલાયેલું છે કિડની રેકેટ
પોલીસ તપાસમાં જાણવા મળ્યું છે કે, શ્રીલંકાનો ડૉ. સંજીવા આંધ્ર અને તેલંગાણાના લોકોની કિડનીનો પણ સોદો કરવામાં સામેલ રહ્યો છે. હૈદરાબાદ પોલીસે પણ આ મામલે આ શ્રીલંકન ડોક્ટર સામે ફરિયાદ દાખલ કરી છે. ડૉ. સંજીવા 2003માં ઈન્ડિયન અને શ્રીલંકન મેડિકલ કાઉન્સિલમાં રજિસ્ટર્ડ થયો હતો. તેના સિવાય અન્ય ત્રણ શ્રીલંકનો પણ કિડની રેકેટમાં સામેલ હોવાનું પોલીસનું કહેવું છે.
ગુજરાતમાં ફેલાઈ ગયું છે જાળુ
સુરત, વડોદરા અને અમદાવાદના પણ કેટલાક લોકોએ આ જ પ્રકારે પોતાની કિડની વેચી હોવાની શક્યતા છે. આ કૌભાંડની કડી આણંદના પંડોલી ગામ સાથે પણ સંકળાયેલી છે, જ્યાં કેટલાક લોકોએ રુપિયા માટે પોતાની કિડની વેચી હતી. પંડોલી ગામના લોકોની કિડનીના સોદા કરવામાં જે આરોપીની સામેલગીરી હતી, તે જ આ કેસ સાથે પણ સંકળાયેલો હોવાનું પોલીસ અનુમાન લગાવી રહી છે.