છોટાઉદેપુર / ગુજરાતના માઉન્ટેન મેન: પતિ-પત્નીના સંઘર્ષની કહાની, પાણી માટે 3 મહિનાથી પથરા સાથે ભીડી રહ્યા છે બાથ

• ગુજરાતનો માઉન્ટેન મેન છોટાઉદેપુરનો ખુશાલ ભીલ
• પહાડ ખોદી બનાવી રહ્યા છે કૂવો
• પહાડમાંથી પાણી કાઢવા પરિશ્રમ 

દશરથ માંઝી નામ સાંભળતા જ બિહારના માઉન્ટેન મેનની યાદ આવી જાય. જેણે પહાડ ચીરી રસ્તો બનાવ્યો હતો. પરંતુ આજે આવા જ એક ગુજરાતના માઉન્ટેન મેનની વાત કરવી છે. જેણે પહાડ ખોદી પાણી કાઢવાનું પ્રણ લીધું છે. 

સિંચાઈની સુવિધાનો અહીં છે અભાવ 
ભાઈ બિહારના દશરથ માંઝીને તો તમે ખુબ સારી રીતે ઓળખતા હશો. પરંતુ હવે જરા છોટાઉદેપુર જિલ્લાના કડુલીમહુડી ગામના ખુશાલ ભીલ જેમણે પહાડ ચીરી રસ્તો બનાવવાનું નહીં પરંતુ પહાળ ખોદી કુવો બનાવવાનું પ્રણ લીધું છે. અને છેલ્લા 3 મહિનાથી ખુશાલ ભીલ પોતા પત્ની સાથે મળીને એકલા હાથે કારમીઢ પથ્થરો તોડી કૂવો બનાવી રહ્યા છે. 

પાણી ન નિકળ્યું તો ચોમાસામાં તળાવ રૂપે કુવો ભરાઈ જશે
અંદાજીત 30થી 40 ફૂટ જેટલો ઉંડો કૂવો ખુશાલભાઈ ખોદી ચૂક્યા છે. અને આ કામમાં તેમના પત્ની તેમને મદદ કરી રહ્યા છે. તેમનું માનવું છે કે, કુવો ખોદી પાણી નિકળશે તો તેવો પોતાની જમીન પર ખેતી કરી શકશે. અને જો પાણી ન નિકળ્યું તો ચોમાસામાં તળાવ રૂપે કુવો ભરાઈ જશે. જેનો ઉપયોગ પણ ગામ લોકોને થશે.

સરકારી યોજનાનો નથી મળતો લાભ 
મહત્વનું છે કે, કડુલીમહુડી ગામ સહિતના આસપાસના અનેક ગામડાઓમાં સિંચાઈ માટે કોઈ સુવિધા નથી. તેવામાં જળસંચય માટે કરોડો રૂપિયા પાણીની જેમ વહાવતી સરકાર પાસે હાલ અહીંના લોકોની બસ એક જ માગ છે કે, તેમના વિસ્તારમાં સિંચાઈને લગતી કોઈ યોજનાનો લોકોને લાભ મળે. સાથે જ ખુશાલભાઈ જેવા વ્યક્તિને કુવો ખોદવા માટે પણ સરકારી યોજનાનો લાભ મળે. જેથી કરીને તેમને આર્થિક રીતે મદદ મળી શકે.