કોંગ્રેસના આ માજી ધારાસભ્યએ ફરી પકડ્યો 'પંજા'નો હાથ, કહ્યું- છાતી પર પથ્થર રાખીને છોડ્યો હતો પક્ષ

વડોદરાઃ ભાજપ, કોંગ્રેસ સહિતના પક્ષોમાં હજુ પણ પક્ષ પલટો ચાલી રહ્યો છે. ત્યારે કોંગ્રેસના માજી ધારાસભ્ય ખુમાનસિંહ ચૌહાણ NCPમાંથી ફરી કોંગ્રેસમાં જોડાયા છે.

પ્રદેશ કોગ્રેસ પ્રમુખ અમિત ચાવડાની હાજરીમાં ખુમાનસિંહ ચૌહાણ કોંગ્રેસમાં જોડાયા છે. ત્યારે આ દરમિયાન ખુમાનસિંહે કહ્યું કે, થોડા મનદુઃખથી મેં 2017માં છાતી પર પથ્થર રાખીને કોંગ્રેસ છોડી હતી. જીલ્લા અને તાલુકામાં કોંગ્રેસ કેવી રીતે મજબૂત બને તેના પ્રયત્નો કર્યા. કોંગ્રેસમાં મેં અનેક પદ મેળવ્યા છે. હવે મારી કોઠા સૂઝ અને આવડતથી કોંગ્રેસ મજબૂત બને તેવા પ્રયત્નો કરીશે. જોકે આ સાથે તેમણે ભાજપ અને મોદી સરકાર પર આકરા પ્રહારો કર્યા હતા.





તેઓ સાવલીના પૂર્વ ધારાસભ્ય છે. 2017માં ગત વિધાનસભા ચૂંટણીમાં કોંગ્રેસે ટિકિટ ન આપતા તેઓ નારાજ થઇ NCPમાં જોડાયા હતા. ત્યારબાદ હવે ફરીથી કોંગ્રેસમાં જોડાયા છે.



ત્યારબાદ ખુમાનસિંહ ચૌહાણે એનસીપીમાંથી ફોર્મ ભર્યુ હતું, પરંતુ તેઓ હારી ગયા હતા. સાવલીની બેઠક પરથી ભાજપના કેતન ઇમાનદારની જીત થઇ હતી.



મહત્વનું છે કે સાવલી બેઠક પરથી ખુમાનસિંહ ચૌહાણ 4 વખત ધારાસભ્ય રહી ચૂક્યા છે. જેઓ આજે વિધિવત રીતે કોંગ્રેસમાં જોડાયા છે. 



અત્રે ઉલ્લેખનીય છે કે ભાજપ અને કોંગ્રેસ દ્વારા તોડજોડની રાજનીતિ ચાલી રહી છે. ત્યારે કોંગ્રેસના નારાજ નેતાઓને ફરી કોંગ્રેસમાં લાવવાના પ્રયત્નો થઇ રહ્યા છે.