રાજકોટ / ખોડલધામના ચેરમેન નરેશ પટેલનું ગુજરાત વિધાનસભા ચૂંટણીમાં ટિકિટ અંગે મોટું નિવેદન

• ખોડલધામના ચેરમેન નરેશ પટેલની પ્રેસ કોંફરન્સ
• અમે કોઇ પાર્ટી પાસે ટિકિટની માંગણી નથી કરવાના
• અગાઉ પાટીદાર સમાજના આગેવાનો માટે ટિકિટની માગ કરાઇ હતી

રાજનીતિમાં કરિયર બનાવવા ઈચ્છતા યુવાનો માટે પાટીદારોની સંસ્થા ખોડલધામ દ્વારા રાજનીતિની પાઠશાળા શરૂ કરવામાં આવશે. સરદાર પટેલ ભવનમાં રાજનીતિના કલાસ શરૂ કરવામાં આવશે. જેના ભાગરૂપે આજે ખોડલધામના ચેરમેન નરેશ પટેલ દ્વારા એક પ્રેસ કોંફરન્સનું આયોજન કરવામાં આવ્યું હતું. જેમાં તેઑએ ગુજરાત વિધાનસભા ચૂંટણીમાં ટિકિટ અંગે મોટું નિવેદન આપ્યું હતુ. તેમણે જણાવ્યું હતુ કે અમે કોઇ પાર્ટી પાસે ટિકિટની માંગણી કરવાના નથી. મહત્વનું છે કે અગાઉ પાટીદાર સમાજના આગેવાનો માટે ટિકિટની માગ કરવામાં આવી હતી.

ટિકિટ માટે અમારી કોઇ માંગણી નથીઃ નરેશ પટેલ
રાજનીતિ કલાસ શરૂ કરતાં પહેલાં એક સેમિનાર યોજાયો હતો. જે સેમિનારમાં ભાજપ-કોંગ્રેસ,આપના નેતાઓ મોટી સંખ્યામાં ઉપસ્થિત રહ્યા હતા. આ સેમિનારમાં ભાજપના નેતા ધનસુખ ભંડેરીએ પણ હાજરી આપી હતી. બીજી બાજુ કોંગ્રેસના નેતા મનહર પટેલ અને પાટીદાર સમાજના આગેવાન અને બિલ્ડરો પણ જોડાયા હતા. આ અવસરે પાટીદાર સમાજના આગેવાન અને ખોડલધામના ચેરમેન નરેશ પટેલે જણાવ્યું હતું કે આગામી વિધાનસભાની ચૂંટણીમાં અમારા સમાજના આગેવાનો કોઈ પણ રાજકીય પક્ષો પાસે ટિકિટની માંગને લઈને  જવાના નથી. ટીકીટને લઈને અમારી કોઈ પણ માંગણી નથી. વધુમાં અગાઉ પાટીદાર આગેવાન જેરામ પટેલે ચૂંટણીમાં 50 ટીકીટની માંગ કરી હતી આ બાબતે પૂછતા નરેશ પટેલે જણાવ્યું હતું કે આમાં કોઇ ચોક્કસ આંકડો હોતો નથી. પરંતુ સારા માણસો રાજકારણમાં આવે તે જરૂરી છે. તેમ જણાવી પાટીદાર સમાજના આગેવાનો માટે અને જેરામ પટેલ દ્વારા જે ટીકીટ માગવામાં આવી છે તે પોતાનો પ્રશનલ ઓપીનીયન હોવાનું નરેશ પટેલે ઉમેર્યું હતું. 

નરેશ પટેલે રાજનીતિની પાઠશાળા સંસ્થા શરૂ કરવાની જાહેરાત કરી હતી
મહત્વનું છે કે  પાટીદારોની સંસ્થા ખોડલધામ દ્વારા રાજનીતિમાં ભવિષ્ય બનાવવા ઈચ્છતા યુવાઓ માટે રાજનીતિની પાઠશાળા શરૂ કરવા જાહેરાત કરાઇ હતી. જેંને યુવા રાજનૈતિક નેતૃત્વ સંસ્થા નામ આપવામાં આવ્યું છે. નરેશ પટેલે થોડા દિવસો પહેલા રાજનીતિમાં નહી જોડાય તેવી જાહેરાત કરી રાજનીતિની પાઠશાળા સંસ્થા શરૂ કરવાની જાહેરાત કરી હતી. આ અંગે ખોડલધામ દ્વારા  સર્વ સમાજના નામે જાહેરાત પણ બહાર પાડવામાં આવી હતી.