રાજનીતિ  / રાજ્યસભાના રણમાં અડધી રાતે થઈ ગયો 'ખેલ' : 16માંથી 8 બેઠક ભાજપને ફાળે, 6 કોંગ્રેસ, જાણો સંપૂર્ણ પરિણામ

• રાજ્યસભા ચૂંટણીમાં ચમત્કાર: શરદ પવાર 
• સંજય રાઉતે કર્યા ચૂંટણીપંચ પર પ્રહાર
• હરિયાણા રાજ્યસભા ચૂંટણીમાં કોંગ્રેસના દિગ્ગજ નેતાની હાર 

રાજ્યસભા ચૂંટણી 2022માં મહારાષ્ટ્ર અને હરિયાણામાં ભાજપને મોટો ફાયદો થયો છે. મહારાષ્ટ્રમાં ભાજપ અને MVA ને 3-3 સીટો મળી છે. તો હરિયાણામાં પણ કોંગ્રેસના દિગ્ગજ નેતાને હરાવી ભાજપે માસ્ટર જેમ સફળ બનાવી છે. રાજ્યસભાના રણમાં બે રાજ્યોમાં વિપક્ષ જોતું રહી ગયું હોય અને ભાજપની માસ્ટર ગેમ સફળ થી હોવાની સ્થિતિ બની છે. 
 
મહારાષ્ટ્રમાં MVA અને ભાજપને 3-3 બેઠકો મળી

મહા વિકાસ અઘાડી (MVA) સરકારને આંચકો લાગ્યો છે. મહારાષ્ટ્રમાં રાજ્યસભાની છ બેઠકો માટે શુક્રવારે ભારે ધમાલ વચ્ચે મતદાન થયું હતું. મત ગણતરીને લઈને શનિવારે વહેલી સવારે જાહેર થયેલા પરિણામોમાં શાસક એમવીએ ગઠબંધન અને મુખ્ય વિરોધ પક્ષ ભાજપને સમાન સંખ્યામાં બેઠકો મળી. MVAને છમાંથી ચાર બેઠકો જીતવાની આશા હતી, પરંતુ તે ભાજપની બરાબરી પર માત્ર 3-3 બેઠકો જીતી શકી. 

મહારાષ્ટ્રની રાજ્યસભા ચૂંટણીમાં ચમત્કાર: શરદ પવાર 

એનસીપીના વડા પવારના જણાવ્યું હતું કે, મહારાષ્ટ્રની રાજ્યસભા ચૂંટણીમાં એક ચમત્કાર થયો કારણ કે, ભાજપના નેતા દેવેન્દ્ર ફડણવીસ સ્વતંત્ર ધારાસભ્યોને ભાજપની તરફેણમાં લાવવામાં સફળ થયા. પવારે એમ પણ કહ્યું હતું કે, આનાથી સત્તારૂઢ મહા વિકાસ અઘાડી સરકારની સ્થિરતાને નુકસાન નહીં થાય. 

સંજય રાઉતના ચૂંટણીપંચ પર પ્રહાર

રાજ્યસભામાં ફરી ચૂંટાયેલા શિવસેનાના સાંસદ સંજય રાઉતે ચૂંટણીપંચ પર ભાજપ પ્રત્યે પક્ષપાતી હોવાનો આરોપ લગાવ્યો હતો. સંજય રાઉતે જણાવ્યું હતું કે, ચૂંટણીપંચે અમારા એક મતને અમાન્ય જાહેર કર્યો. અમે તેની સામે વાંધો ઉઠાવ્યો હતો, પરંતુ કોઈ કાર્યવાહી થઈ ન હતી.

હરિયાણા રાજ્યસભા ચૂંટણીમાં કોંગ્રેસના દિગ્ગજ નેતાની હાર 

હરિયાણામાં રાજ્યસભાની ચૂંટણીમાં જીત માટે કોંગ્રેસ ઘણા દિવસોથી તૈયારી કરી રહી હતી. ધારાસભ્યોને લોભથી બચાવવા માટે તેમને રાયપુર પણ મોકલવામાં આવ્યા હતા પરંતુ અંતે કુલદીપ બિશ્નોઈએ પાર્ટી છોડી દીધી અને અજય માકનનો પરાજય થયો છે. શુક્રવારે મોડી રાત્રે હરિયાણાની બે રાજ્યસભા બેઠકો પર ભાજપના ક્રિષ્ન લાલ પંવાર અને ભાજપ-જેજેપી સમર્થિત અપક્ષ ઉમેદવાર કાર્તિકેય શર્માને વિજેતા જાહેર કરવામાં આવ્યા હતા. કોંગ્રેસના દિગ્ગજ નેતા અજય માકનનો પરાજય થયો હતો. કોંગ્રેસે આંતરકલહ ટાળવાના તમામ પ્રયાસો કર્યા પરંતુ તેઓ એક મતથી હાર્યા હતા. 

મોડી રાત્રે પરિણામ આવતા કોંગ્રેસની હાર 

હરિયાણામાં શુક્રવારે મતદાન બાદ 5 વાગ્યે મતોની ગણતરી શરૂ થવાની હતી. પરંતુ JJP નેતાઓ અને અપક્ષ ઉમેદવાર કાર્તિકેય શર્માએ કમિશનને કોંગ્રેસના બે ધારાસભ્યો કિરણ ચૌધરી અને બીબી બત્રાના મત ગેરકાયદે જાહેર કરવાની માંગ કરી હતી. કાર્તિકેયના સમર્થનમાં બીજેપી અને બીજી બાજુથી કોંગ્રેસ ચૂંટણી પંચ પહોંચ્યા હતા. આ પછી ઘટનાક્રમ ઝડપથી બદલાયો અને મોડી રાત્રે કોંગ્રેસને હારનો સામનો કરવો પડ્યો છે.