ખેડા જીલ્લાના થર્મલ પાવર સ્ટેશનના ગેટ પાસે જમીન વળતરની માંગણી સાથે સાગોલ ગામના ખેડૂતોએ પરિવાર સાથે એક દિવસના પ્રતિક ઉપવાસ અને ધરણા કર્યા હતાં. જીઇબી દ્વારા વર્ષ 2002 થી 2004 સુધી કુલ 45 હેક્ટર જમીન ખેડૂતો પાસેથી આચકી લીધી છતાં વળતર ન મળતા ખેડૂતો કોર્ટના શરણે ગયા હતાં. કોઇપણ જમીનનું 55 કરોડ રૂપિયાનું વળતર એકપણ ખેડૂતને ન મળતા ખેડૂતો પોતાના પરિવાર સાથે પ્રતિક ઉપવાસ ઉપર બેઠા હતાં. જોકે કોર્ટના આદેશ કર્યા બાદ પણ વળતરની ચુકવણી ન થતા ખેડૂતોએ ઉપવાસનું શસ્ત્ર ઉપાડ્યું હતું.
આ ઘટનાની મળતી વિગત પ્રમાણે વણાકબોરી થર્મલ પાવર સ્ટેશનમાંથી નીકળતી રાખના સંગ્રહ કરવા માટે પ્લાન્ટની નજીક આવેલ સાગોલ ગામના ખેડૂતો પાસેથી કુલ ૪૫ હેક્ટર જમીન ગુજરાત વિદ્યુત બોર્ડે વર્ષ ૨૦૦૨થી ૨૦૦૪ સુધી સાત તબકકામાં લીધી હતી. જે બાદ ખેડૂતોને જમીનના વળતર પેટેના ૫૫ કરોડ રૂપિયા ના મળતા ખેડૂતોએ નડીયાદ ડિસ્ટ્રીકટ કોર્ટના દરવાજા ખખડાવ્યા હતા.
જે મામલે નડીયાદ કોર્ટે ડીસેમ્બર ૨૦૧૭માં ખેડૂતોને તરત જમીન વળતર ચુકવવા આદેશ કર્યા હતા આમછતાં જીઇબી દ્વાર હજુ ખેડૂતોને વળતર ચુકવવામાં નથી આવતું જેને લઇ ખેડૂતો હવે લડી લેવાના મૂળમાં છે અને અગામી દિવસોમાં આ મામલે ઉગ્ર લડત ગાંધી ચીંધ્યા માર્ગે આપવાની ચીમકી ઉચ્ચરી છે ખેડૂતોના સમર્થનમાં સમગ્ર રાજપૂત અને ક્ષત્રીય સમાજ આવી ગયો હતો.