કચ્છના નાના રણ તરીકે જાણીતું 'ખારાઘોડા રણ' વિદેશી પક્ષીઓનો ઝમાવડો

કચ્છઃ સુરેન્દ્રનગર જીલ્લાના પાટડી તાલુકના ખારાઘોડાનું રણ અગરિયાઓ તેમજ ઘુડખર માટે તો પ્રખ્યાત છે. પરંતુ શિયાળાની શરૂઆત થતા જ વિદેશથી આવતા વિદેશી પક્ષીઓ રણમાં આવીને મહેમાન બને છે. રણની રોનકમાં વધારો કરે છે ત્યારે ચાલુ વર્ષે પણ રણમાં અનેક વિદેશી પક્ષીઓએ આકર્ષણ જમાવ્યું છે. જેને નિહાળવા માટે મોટી સંખ્યામાં લોકો ઉમટી પડે છે.


સામાન્ય રીતે રણનું નામ આવે એટલે લોકોના મનમાં કરછના રણનો જ વિચાર આવે છે. પરંતુ કરછના નાના રણ તરીકે જાણીતું ખારાઘોડાનું રણ પણ પોતાની આગવી ઓળખ ધરાવે છે. શિયાળાની ફૂલ ગુલાબી ઠંડીનો પ્રારંભ થતા જ વિદેશી પક્ષીઓ આ રણમાં મોટી સંખ્યામાં આવે છે અને પ્રવાસીઓનું આકર્ષણનું કેન્દ્ર બની રહે છે. 


હાલ ખારાઘોડાના રણમાં ફ્લેમિંગો ક્રેન બામણી ડક કુંજ નીલ યાયાવર ભગતડું સુરખાબ સહીત શિકારી પક્ષીઓમાં મોટા કુંજ અને ઈગલ જેવા વિદેશીપક્ષીઓ ખારાઘોડા રણ ખાતે આવી પહોચ્યા છે. જેને જોવા મોટી સંખ્યામાં લોકો ઉમટી પડે છે.


યુરોપ અમેરિકા અને ગલ્ફ જેવા દેશોમાં શિયાળાના સમય દરમિયાન વાતાવરણમાં અચાનક બદલાવ આવે છે. અહીં ખુબ જ ઠંડીના કારણે બરફ જામી જાય છે. જયારે ભારતમાં વિદેશી પક્ષીઓને રહેવામાં અનુકુળ વાતાવરણ મળી રહે છે. આથી શિયાળાની શરૂઆત થતા જ વિદેશી પક્ષીઓના ટોળાની ખારાઘોડા રણમાં આવવાની શરૂઆત થઇ જાય છે.


શિયાળાના ચાર મહિના દરમિયાન આ વિદેશીપક્ષીઓ અહીં વસવાટ કરે છે. આ વિદેશી પક્ષીઓને નિહાળવા દર વર્ષે 20 000થી પણ વધુ સહેલાણીઓ મુલાકાત લેતા હોય છે. જેના કારણે અભ્યારણને લાખોની રકમની આવક પણ થાય છે.


દર વર્ષે હજારોની સંખ્યામાં અલગ-અલગ જાતના વિદેશી પક્ષીઓ ખારાઘોડાના રણમાં આવે છે. ત્યારે ફોરેસ્ટ વિભાગ દ્વારા પણ સહેલાણીઓ સહીત વિદેશી પક્ષીઓની ખાસ કાળજી રાખવામાં આવે છે.


લોકો ભલે કહેતા હોય કે 'કચ્છ નહિ દેખા તો કુછ નહિ દેખા' પરંતુ ખારાઘોડાનું રણ પણ એકવાર જોવા જેવું તો છે જ. એમાં પણ શિયાળામાં તો ખારાઘોડાનું રણ પ્રવાસીઓથી ઉમટી પડે છે.