કેસ / અમેરિકામાં PM મોદી અને અમિત શાહ સામે થયો 10 કરોડ ડોલરનો કેસ, જાણો પછી શું થયું

• અમેરિકાની એક અદાલતમાં પીએમ મોદી અને અમિત શાહ વિરદ્ધ દાખલ કેસ ફગાવી દેવાયો 
• કાશ્મીર ખાલિસ્તાન ગ્રુપ અને અન્ય બે વ્યક્તિઓએ કર્યો હતો કેસ 
• બે તારીખ સુધી અરજીકરનારાઓ ઉપસ્થિત ન રહ્યા તેથી કેસ રદ 

શું છે મામલો 

અમેરિકાની એક અદાલતમાં ભારતના વડાપ્રધાન પીએમ મોદી અને કેન્દ્રીય ગૃહમંત્રી અમિત શાહ વિરુદ્ધ દાખલ દસ કરોડ ડોલરના કેસ ફગાવી દેવામાં આવ્યો છે. આ કેસ કાશ્મીર અને ખાલીસ્તાનના ગ્રુપ દ્વારા કરવામાં આવ્યો હતો.  અરજી કરનારા સુનાવણીમાં બે તારીખ ઉપસ્થિત ન થઇ શક્યા જે બાદ અરજીને ફગાવી દેવામાં આવી છે. 

કેમ થયો હતો કેસ 

ટેક્સાસના હ્યુસ્ટનમાં 19 સપ્ટેમ્બર, 2019માં આયોજિત હાઉડી મોદી કાર્યક્રમ બાદ આ કેસ દાખલ કરવામાં આવ્યો હતો. નોંધનીય છે કે ગયા વર્ષે ભારત સરકાર દ્વારા જમ્મૂ કાશ્મીરથી વિશેષ રાજ્યનો દરજ્જો સમાપ્ત કરવામાં આવ્યો હતો અને ધારા 370 ખતમ કરવામાં આવી હતી. ભારત સરકારના આ નિર્ણયને અરજી કરનારાઓએ અમેરિકામાં પડકાર આપ્યો અને પીએમ મોદી, અમિત શાહ અને લેફ્ટનન્ટ કંવલ જીત સિંહ ઢીલ્લોં સામે કેસ કરીને વળતરના રૂપમાં દસ કરોડ ડોલરની માંગ કરવામાં આવી હતી. 

કોણ છે લેફ્ટનન્ટ ઢીલ્લોં 

લેફ્ટનન્ટ કંવલ જીત સિંહ ઢીલ્લોં ડિફેન્સ ઈન્ટેલીજન્સ એજન્સીના ડીરેક્ટર છે અને CDSને આધીન ઇન્ટીગ્રેટેડ ડિફેન્સ સ્ટાફના ઉપપ્રમુખ પણ છે. નોંધનીય છે કે છઠ્ઠી ઓકટોબરે કોર્ટે આપેલા આદેશમાં કહેવામાં આવ્યું હતું કે કાશ્મીર ખાલિસ્તાન ફ્રન્ટ દ્વારા મામલાને આગળ વધારવા માટે કંઈ કરવામાં આવ્યું નથી. તે બાદ બે વાર તારીખ આપવામાં આવી પરંતુ અરજી કરનારાઓ ઉપસ્થિત રહ્યા નહીં. અન્ય બે અરજી કરનારાઓની ઓળખ થઇ શકી નથી.