એક ફ્લેટમાં પોતાના પિતા સાથે જોડે રહેતી 3 બહેનો એક રાત્રે તેમના પિતા ઉપર ચપ્પુ, હથોડા અને મરચાની ભૂકીથી હુમલો કરીને તેમને મોતને ઘાટ ઉતારી દીધા.
આ ઘટના બાદ આ ત્રણેય બહેનોએ પોતે પોલીસને ફોન કર્યો અને પોલીસે તેમની ધરપકડ કરી. આશરે અઢી વર્ષ પહેલા આ ઘટના રશિયામાં બની હતી.
રશિયામાં ઘટનાને લઇને વિભાજીત લાગણીઓ
રશિયામાં આ ઘટનાને લઇને કેટલાક લોકો એવું માને છે કે બહેનોના આ કૃત્ય પાછળ નક્કર કારણો હતા અને તેમણે પોતાના બચાવ માટે આ પગલું ભર્યું હતું. જો કે કેટલાક લોકો આ ઘટનાને બદલો લેવા માટે ઠંડા કલેજે કરાયેલી હત્યા માને છે.
પિતા લાંબા સમયથી તેમની દીકરીઓ ઉપર જુલમ ગુજારી રહ્યા હતા
આ છોકરીઓને મીડિયામાં ખચાતુર્યન બહેનોના નામે બોલાવવામાં આવે છે. જ્યારે તેમના પિતાની ડેડ બોડીની તપાસ કરવામાં આવી ત્યારે તેમના શરીર ઉપર ચપ્પુના 30 નિશાન મળ્યા. પિતાના માથા, ગળા અને છાતી ઉપર હુમલાના નિશાન જોવા મળ્યા હતા. જ્યારે પોલીસે હત્યાના કારણની તપાસ કરી ત્યારે તેમણે જાણ્યું કે પિતા લાંબા સમયથી તેમની દીકરીઓ ઉપર જુલમ ગુજારી રહ્યા હતા.
BBCના અહેવાલ ઉપરથી જાણવા મળ્યું કે પિતા તેમની દીકરીઓને છેલ્લા 3 વર્ષથી મારતો હતો. તેમને ટોર્ચર કરતો હતો. તેમને કેદીઓની જેમ રાખતો હતો અને તેમની સાથે યૌન શોષણ પણ કરતો હતો.
દીકરીઓને પોતાની મા ને મળવાથી પણ રોકી રાખી હતી
આ ઘટના સમયે ત્રણ દીકરીઓ એન્જેલીના, મારિયા અને ક્રિસ્ટીનાની ઉંમર અનુક્રમે 18, 17 અને 19 વર્ષની હતી, આ છોકરીઓ સાથે તેમની માતા પણ ઘરેલું હિંસાનો શિકાર બની ચુકી હતી, આ ઘટના સમયે તેમની મા તેમની સાથે નહોતી રહેતી. આ હેવાન જેવા પિતાએ પોતાની દીકરીઓને પોતાની મા ને મળવાથી પણ રોકી રાખી હતી. 27 જુલાઈના રોજ આ ઘટનાને અંજામ આપવામાં આવ્યો.
રશિયામાં આ બહેનોના સમર્થન માટે થઇ રહ્યા છે પ્રદર્શનો
ડોમેસ્ટિક વાયોલન્સના તમામ પુરાવા હોવા છતાં ત્રણેય બહેનો ઉપર હત્યાનો આરોપ મુકાયો છે. આ કારણે રશિયામાં આ ચર્ચાનો મુદ્દો બન્યો છે. ત્રણ લાખથી વધુ લોકોએ એક કેમ્પેઈન યોજીને બહેનોને મુક્ત કરવાની માંગ કરી છે. આ મુદ્દામાં રશિયાના માનવ અધિકાર સંગઠનો પણ જોડાયા છે.
નોંધનીય છે કે રશિયામાં પોલીસ મોટાભાગે ઘરેલું હિંસાને પારિવારિક વિવાદ માને છે અને ખૂબ ઓછી મદદ કરે છે.