કન્નડ ફિલ્મનાં સુપરસ્ટાર એક્ટર યશની બહુચર્ચિત ફિલ્મ કેજીએફ ચેપ્ટર-2ની રિલીઝ ડેટ જાહેર થઈ ગઈ છે. આ ફિલ્મ દેશભરમાં કન્નડ સહિત, તામિલ, તેલુગુ, મલયાલમ અને હિન્દી ભાષામાં સિનેમાઘરોમાં રિલીઝ કરાશે.
કેજીએફ ચેપ્ટર-2ની પોપ્યુલારિટી સામે આ ફિલ્મ દમ તોડી શકે છે
ટાઇગર શ્રોફને તેનાં કરિયરનો મોટો ફટકો પડી શકે છે
એક દિવસે બોક્સ ઓફિસ પર ટકરાવુ ભારે પડશે
કેજીએફ ચેપ્ટર-2નાં ટીઝરે રેકોર્ડ સર્જ્યા હતા
કન્નડ ફિલ્મ કેજીએફ ચેપ્ટર-1એ દેશભરમાં ખૂબ પ્રેમ મેળવ્યો જેથી તેનાં ચેપ્ટર-2ની દર્શકો કાગડોળે રાહ જોઈ રહ્યાં હતા. ચેપ્ટર-2નું ટીઝર પણ થોડા સમય પહેલા રિલીઝ કરવામાં આવ્યું હતું અને ટીઝરે પણ ઘણાં રેકોર્ડ પોતાને નામે કર્યાં હતા. જ્યારે હવે ચેપ્ટર-2ની રિલીઝ ડેટ જાહેર થઈ છે ત્યારે બોલિવૂડનાં એક જાણીતા એક્ટરની ફિલ્મનાં મેકર્સ ચિંતામાં મુકાઈ ગયા છે. કેજીએફ ચેપ્ટર-2 જ્યારે રિલીઝ થવાની છે ત્યારે બોલિવૂડના એક્ટર ટાઇગર શ્રોફનાં કરિયરની સૌથી મોટી ફિલ્મ હિરોપંતી-2 પણ તે જ દિવસે રિલીઝ થવાની છે. જેથી બોક્સ ઓફિસ પરની આ ટક્કર ટાઇગર શ્રોફને કેટલી ભારે પડી શકે છે તે જોવું રહ્યું.
રિલીઝ ડેટ જાહેર થતા દર્શકોનો ઉત્સાહ બમણો
કેજીએફ ચેપ્ટર-2ને લઈને દર્શકો છેલ્લા ઘણાં સમયથી રાહ જોઈ રહ્યાં હતા. જેથી જ્યારે 16 જુલાઈ 2021નાં દિવસે કેજીએફ ચેપ્ટર-2ની રિલીઝ ડેટ જાહેર કરવામાં આવી ત્યારે દર્શકોનાં ઉત્સાહમાં બમણો વધારો જોવા મળી રહ્યો છે. જોકે હાલ તે ફિલ્મનું પોસ્ટ પ્રોડક્શન બાકી છે પણ રિલીઝ ડેટ સુધીમાં આ ફિલ્મ સંપૂર્ણ રીતે તૈયાર થઈ જશે તેવી ગણતરી નિર્માતાઓ દ્વારા કરવામાં આવી રહી છે.
હિરોપંતી-2નાં મેકર્સ આવ્યા ચિંતામાં
કેજીએફ ચેપ્ટર-2ની રિલીઝ ડેટ સામે આવતા એહમદ ખાન દ્વારા નિર્દેશિત ફિલ્મ હિરોપંતી-2નાં મેકર્સ ચિંતામાં સપડાયા છે. હિરોપંતી-2ની રિલીઝ ડેટ 16 જુલાઈ 2021 પહેલાથી જ નક્કી હતી પણ હવે જ્યારે કેજીએફ ચેપ્ટર-2 પણ તે જ દિવસે રિલીઝ થઈ રહી છે ત્યારે એ જોવાનું રહ્યું કે ટાઇગર શ્રોફની આ ફિલ્મને બોક્સ ઓફિસ પર કેટલો ફટકો પડે છે.
રિલીઝ ડેટ લંબાવી શકાય
જોકે લાગે છે કે હિરોપંતી-2ની રિલીઝ ડેટ પાછી ખસેડાય તેમ છે. કેમકે હિરોપંતી-2નું શૂટીંગ હજુ સુધી ચાલુ નથી થયુ જ્યારે કેજીએફ ચેપ્ટર-2નું શૂટિંગ પૂરું થઈ ગયુ છે અને પોસ્ટ પ્રોડક્શનનું કામ ચાલે છે. ટાઇગર શ્રોફની આ ફિલ્મનું શૂટિંગ માર્ચ પહેલા શરુ થઈ શકે છે. માટે માર્ચમાં શરુ થનાર ફિલ્મનું કામ જુલાઇ સુધીમાં ખતમ થાય તેવી શક્યતા ખૂબ ઓછી છે. માટે હિરોપંતી-2નાં મેકર્સ ફિલ્મ રિલીઝ ડેટ આગળ લંબાવે તેવી પૂરેપૂરી શક્યતા છે. એમ પણ કેજીએફ ચેપ્ટર-2ની પોપ્યુલારિટીને જોતા હિરોપંતી-2ને પણ તે જ દિવસે રિલીઝ કરવાનો અખતરો હિરોપંતી-2નાં મેકર્સને મોંઘો પડી શકે તેમ છે.