કોલકાતા / લેડી ડોક્ટર રેપ અને મર્ડરનો મામલો ચગ્યો, ડોક્ટરોએ ફરી કર્યું હડતાળનું એલાન

પશ્ચિમ બંગાળમાં તાલીમાર્થી મહિલા ડૉક્ટર પર બળાત્કાર અને ત્યારબાદ હત્યાને લઈને દેશભરમાં વિરોધ થઈ રહ્યો છે. બુધવારે આરજી કાર મેડિકલ કોલેજ અને હોસ્પિટલમાં તોડફોડ કરવામાં આવી હતી, જેના કારણે ફેડરેશન ઓફ રેસિડેન્ટ ડોક્ટર્સ એસોસિએશન ઈન્ડિયા એટલે કે ફોર્ડાએ ફરીથી હડતાળ પર જવાની જાહેરાત કરી છે. ફોર્ડાએ કહ્યું કે કેન્દ્ર અને રાજ્ય સરકાર સુરક્ષા આપવામાં નિષ્ફળ રહી છે.

કેન્દ્ર-રાજ્ય દ્વારા પગલાં ન લેવાતાં ડોક્ટરો નારાજ

ફોર્ડાએ કહ્યું કે આરજી કાર મેડિકલ કોલેજમાં થયેલી હિંસાને ધ્યાનમાં રાખીને અમે અમારા સાથીદારો અને તબીબી સમુદાય સાથે ઊભા છીએ. અગાઉ મંગળવારે (13 ઓગસ્ટ 2024), ડૉક્ટર્સ એસોસિએશને કેન્દ્રીય આરોગ્ય પ્રધાન જેપી નડ્ડા સાથેની બેઠક બાદ હડતાળ પાછી ખેંચી હતી. ફોર્ડાએ એક નિવેદન જારી કરીને કહ્યું કે, "આરજી કાર મેડિકલ કોલેજમાં બનેલી દુ:ખદ ઘટના બાદ અને સરકાર તેના વચનો સમયસર પૂરા ન કરતી હોવાથી, અમે ફરીથી હડતાલ શરૂ કરી રહ્યા છીએ.

અડધી રાતે મેડિકલ કોલેજમાં ભારે તોડફોડ

બુધવારે મધ્યરાત્રિએ કોલકાતાની આરજી કાર મેડિકલ કોલેજમાં આવી એક ઘટના બની, જેણે ડૉક્ટરો, દર્દીઓ અને સામાન્ય લોકોના જીવ જોખમમાં મૂક્યા. વિરોધીઓના વેશમાં આવેલા બદમાશો મોડી રાત્રે હોસ્પિટલમાં દાખલ થયા હતા. હોસ્પિટલમાં એક કલાક સુધી હોબાળો થયો હતો. પોલીસ બેરીકેટ્સ તોડીને કેમ્પસમાં તોડફોડ કરી હતી અને ફરજ પરના કર્મચારીઓને પણ માર માર્યો હતો. તેઓ હોસ્પિટલના દરવાજા, બારીઓ, પથારી, તબીબી સાધનો... જે પણ તેમની સામે આવ્યું તેનો નાશ કરતા ગયા.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ