કેરળમાં રહેવા માટે આવેલા ચીનનો એક યુવાનને હોટલ ન મળતાં કંટાળીને તે તિરુવનંતપુરમ પોલીસ પાસે પહોંચ્યો હતો પરંતુ પોલીસે તેને હોટલને બદલે સીધો હોસ્પિટલના અલગ વોર્ડમાં દાખલ કરી દીધો હતો.
કેરળમાં રહેવા માટે હોટલ ન મળતાં કંટાળીને ચીનનો એક યુવકે તિરુવનંતપુરમ પોલીસનો સંપર્ક સાધ્યો હતો પરંતુ પોલીસે તેને હોટલને બદલે હોસ્પિટલના અલગ વોર્ડમાં દાખલ કરી દીધો હતો. પોલીસે જણાવ્યું કે ભારતની મુલાકાતે આવેલ 25 વર્ષીય પર્યટક મંગળવારે રાજ્યની રાજધાની તિરૂવનંતપુરમ પહોંચ્યો હતો. જ્યારે તેના હોટલમાં જગ્યા મેળવવાના તમામ પ્રયાસો નિષ્ફળ ગયા ત્યારે તે ફરિયાદ સાથે શહેરની પોલીસ કમિશનરની કચેરીએ પહોંચ્યો હતો.
તેણે કહ્યું કે જેવી પોલીસ જવાનોને જાણ થઇ કે તે ચીનથી આવ્યો છે, તેઓએ તેને તાત્કાલિક હોસ્પિટલના એક અલગ વોર્ડમાં દાખલ કરી દીધો. નોંધનીય છે કે ચીનમાં કોરોના વાયરસના કારણે 563 લોકોનાં મોત નીપજ્યાં છે. સિચુઆન પ્રાંતના આ પ્રવાસીમાં વાયરસના કોઈ લક્ષણો નહોતા. જો કે તેના નમૂનાઓ તપાસ માટે મોકલવામાં આવ્યા છે.
માનવામાં આવે છે કે તે 23 જાન્યુઆરીએ દિલ્હી પહોંચ્યો હતો અને મંગળવારે વિમાન દ્વારા કેરળ આવ્યો હતો. તિરુવનંતપુરમ પહોંચ્યા પછી, તે હોટેલમાં એક રૂમ શોધવા નીકળ્યો પણ ચીનથી આવેલ હોવાને કારણે તેને તમામ હોટેલવાળાએ રૂમ આપવાનો ઇન્કાર કરી દીધો હતો. ત્યારબાદ તેણે પોલીસની મદદ માંગી હતી.
પોલીસની સ્પેશ્યલ બ્રાન્ચે તુરંત આરોગ્ય અધિકારીઓને અને જિલ્લા મેજિસ્ટ્રેટની કચેરીને જાણ કરી હતી અને જિલ્લા મેડિકલ ઓફિસરની સૂચનાથી તેને જનરલ હોસ્પિટલના અલગ વોર્ડમાં દાખલ કરાયો હતો. પોલીસે જણાવ્યું હતું કે પરિણામ આવે ત્યાં સુધી તે અલગ વોર્ડમાં રહેશે. કેન્દ્ર સરકારને પણ જાણ કરવામાં આવી છે.
રાજ્યમાં કોરોના વાયરસના ચેપ માટે ચીનથી આવેલ આ યુવાન ઉપરાંત બે અન્ય વિદેશી નાગરિકો સહિત 2,528 લોકોની તપાસ ચાલી રહી છે.