આજે લોકો તેમના ખાતામાંથી પૈસા ઉપાડવા માટે એટીએમનો ઉપયોગ કરે છે. એટીએમમાં છેતરપિંડીની ઘટનાઓ સામે આવી રહી છે. જેમાં કરોડો રૂપિયા લોકોના બેંક ખાતામાંથી સાફ થઈ જાય છે. આપણા ત્યાં મોટાભાગના એટીએમ સેન્ટરમાં સિકયોરિટી ગાર્ડ હોતા નથી. તેનો ફાયદો ગઠિયાઓ ઉઠાવે છે. ત્યારે એટીએમમાંથી પૈસા ઉપાડતી વખતે કેટલીક બાબતોનું ધ્યાન રાખવું જરુરી છે.
એટીએમ સેન્ટરમાં પ્રવેશો ત્યારે એકવાર આજુબાજુ કાળજીપૂર્વક નિરીક્ષણ કરો અને તપાસો કે પોર્ટેબલ કેમેરા સામેની જગ્યાએ અન્ય જગ્યાએ તો લગાવ્યા નથીને?. જ્યાંથી તમારું કાર્ડ અને પિન નંબર એન્ટર કરતાં જોઇ શકાતું હોય?પૈસા ઉપાડતા પહેલા કાર્ડ એન્ટર કરવાના સ્લોટને પણ ધ્યાનથી જુવો. તમને અહીં કંઈક અલગ કે અજુગતું લાગે કે કોઈ અન્ય ઉપકરણ તેના પર દેખાય છે તો સાવચેત રહો. હેકર્સ આ જગ્યાએ કાર્ડ રીડિંગ ચિપ મૂકે છે, જેમાં કાર્ડની સંપૂર્ણ માહિતી સ્ટોર થઇ જાય છે.
કેટલાક લોકો પૈસા ઉપાડવા તેમના ઓળખીતા કે સંબંધીઓને એટીએમ કાર્ડ અને પિન આપે છે.બને ત્યાં સુધી આવું કરવાનું ટાળવું જોઇએ. એવા અનેક બનાવો બન્યા છે જેમાં ઓળકીતા લોકોએ વિશ્વાસનો ભંગ કરી પૈસા ઉપાડી લીધા હોય. એટીએમમાંથી પૈસા ઉપાડતી વખતે પિન નંબર દાખલ કરવો પડે છે.
પિન નાખતી વખતે નંબર એન્ટર કરવામાં આવે છે તે ભાગ એક હાથથી કવર કરવો જોઇએ,પછી ભલે કોઇ આસપાસ હોયકે ન હોય. કેટલાક ચાલાક ગઠિયા બહાર ઉભા રહીને તમે એન્ટર કરેલા પિનનો સચોટ અંદાજ લગાવી શકે છે. પૈસા ઉપાડ્યા પછી, એટીએમ પર કેન્સલ બટન અચુક દબાવવું જોઇએ. આમ કરવાથી તમારી મહત્વપૂર્ણ માહિતી લીક થશે નહીં. ફરીથી સ્ક્રીન પર વેલકમ લખાઇને ન આવે ત્યાં સુધી એટીએમમાંથી બહાર નીકળો નહીં.
જો કોઈ વ્યક્તિ એટીએમ બૂથ પર હાજર હોય, તો તેને પહેલા પૈસા લેવા દો અને પછી અંદર જાવ. તમે પૈસા ઉપાડતા હો ત્યારે કોઇ વ્યકિત અંદર આવે તો તેને બહાર જવાનું કહો. જો તમને કોઇ શંકા લાગે તો તમે પોતે બહાર નીકળી જાવ અને તે વ્યકિત તેનું કામ પતાવીને નીકળે પછી જ અંદર જાવ.