એક સમયે કાર મેન્યુફેક્ચરિંગ માટે વિશ્વમાં સૌથી આગળ પડતો દેશ અમેરિકા, આજે કોમ્પ્યુટર ઇન્ડસ્ટ્રીમાં સૌથી આગળ છે. એ દેશનો મુખ્ય વ્યાપાર રિયલ એસ્ટેટનો છે. ડિફેન્સ, ફિલ્મ, ઓઇલ અને ગેસ, મત્સ્ય ઉદ્યોગ અને ખેતીવાડી આ સરવે પણ અમેરિકાના મહત્ત્વના ઉદ્યોગો છે.
ડિફેન્સ, ફિલ્મ, ઓઇલ અને ગેસ, મત્સ્ય ઉદ્યોગ અને ખેતીવાડી આ સરવે પણ અમેરિકાના મહત્ત્વના ઉદ્યોગો છે
શિક્ષણની બાબતમાં અમેરિકાએ ગ્રેટ બ્રિટનને ક્યારનું પાછળ મૂકી દીધું છે
વર્ષ ૨૦૨૦માં તમે ધારો છો એટલું અમેરિકન સ્વપ્નું સાકાર કરવાનું અઘરું નથી
શિક્ષણની બાબતમાં અમેરિકાએ ગ્રેટ બ્રિટનને ક્યારનું પાછળ મૂકી દીધું છે
શિક્ષણની બાબતમાં અમેરિકાએ ગ્રેટ બ્રિટનને ક્યારનું પાછળ મૂકી દીધું છે. વિશ્વના વિદ્યાર્થીઓ અમેરિકામાં આવેલ હાર્વર્ડ, સ્ટેનફર્ડ અને અન્ય યુનિવર્સિટીઓમાં ભણવાનું પસંદ કરે છે. તબીબી વિજ્ઞાનમાં અમેરિકાએ હરણફાળ ભરી છે. અસાધ્ય બીમારીનો ઇલાજ કરવા લોકો અમેરિકા જાય છે. પર્યટકો માટે સ્ટેચ્યુ ઓફ લિબર્ટી, ડિઝની વર્લ્ડ, યુનિવર્સલ સ્ટુડિયો, નાયગ્રાફોલ્સ, ગાન્ડકેનિયન, લાસ વેગાસના કસીનો, ફ્રીડમ ટાવર, એમ્પાયર સ્ટેટ બિલ્ડિંગ આવાં આવાં અસંખ્ય આકર્ષણો છે. પર્યટનના શોખીનો સૌપ્રથમ અમેરિકા પ્રત્યે જ દૃષ્ટિ કરે છે. વિશ્વના દરેકેદરેક માનવીનું એક અમેરિકન સ્વપ્નું હોય છે.
કોઈને ફરવા, કોઈને ભણવા, કોઈને નોકરી કરવા, કોઈને બિઝનેસ કરવા, કોઈને સ્થળાંતર કરીને એ સ્વતંત્રતાની દેવીના તક અને છતના દેશમાં કાયમ રહેવા જવાની ઇચ્છા હોય છે. આ સર્વેની મૂંઝવણ સામાન્ય છે. કેમ કરીશ પૂરા હું મારા અમેરિકન સ્વપ્નાં? કેમ મેળવીશ હું અમેરિકાના નોન-ઇમિગ્રન્ટ યા ઇમિગ્રન્ટ કેટેગરીના વિઝા?
વિશ્વના લોકોની અમેરિકા જવાની ઇચ્છા એ દેશ શોધાયો ત્યારની છે. દિવસે દિવસે એ ઘેલછા વધતી જ જાય છે. આથી જ એક સમયે 'ખુલ્લા દ્વાર'ની નીતિ ધરાવતાં અમેરિકાએ સ્થળાંતરના કુદરતી નિયમ 'પુશ એન્ડ પુલ'ને રોકવા 'થિયરી ઓફ લેજિસ્ટ્રેટિવ રિસ્ટેન્ટ' અપનાવી છે. કાયદાઓ ઘડી ઘડીને અમેરિકામાં આવતા લોકોને નિયંત્રિત કર્યા છે.
અમેરિકાના વિઝાના બે પ્રકાર છે
અમેરિકાના વિઝાના બે પ્રકાર છે. થોડા સમય માટે ફરવા, તબીબી સારવાર લેવા, ભણવા, નોકરી યા બિઝનેસ કરવા ત્યાં જવું હોય તો નોન-ઇમિગ્રન્ટ વિઝા અને જો કાયમ રહેવા જવું હોય તો ઇમિગ્રન્ટ વિઝા મેળવવાની જરૃરિયાત રહે છે.
બિઝનેસ યા વિઝિટર્સ એટલે કે બી-૧/બી-૨ વિઝા મેળવવા માટે અરજદારે દેખાડી આપવાનું રહે છે કે એનો ઇરાદો અમેરિકામાં કાયમ રહેવાનો નથી. ત્યાં જવા-આવવા, રહેવા-ખાવા અને પરચૂરણ ખર્ચા માટે એની પાસે પૂરતા પૈસા છે. સ્વદેશના એના કૌટુંબિક અને નાણાકીય સંબંધો ખૂબ ગાઢ છે.
આ સર્વે દેખાડી આપવું ખૂબ જ મુશ્કેલ છે. હવેથી તો પબ્લિક ચાર્જ રૃલ, ભલે એ અમલમાં આવ્યો નથી, તો પણ એના કારણે એમની મુશ્કેલીમાં વધારો થયો છે. અમેરિકામાં ભણવા માટે એફ-૧ વિઝાની જરૃરિયાત રહે છે. એ માટે દેખાડી આપવાનું રહે છે કે, વિદ્યાર્થી અંગ્રેજી ભાષામાં પારંગત છે. એણે સેટ, જીમેટ યા જીઆરઈની પરીક્ષામાં સારા માર્ક્સ મેળવ્યા છે.
અમેરિકાની માન્યતા પામેલ યુનિવર્સિટીએ એને પ્રવેશ આપ્યો છે. એની પાસે અમેરિકામાં ભણવા માટેના જરૃરી પૈસાનો બંદોબસ્ત છે. એનો ઇરાદો ત્યાં કાયમ રહેવાનો નથી. સ્વદેશના એના કૌટુંબિક તેમ જ નાણાકીય સંબંધો ખૂબ જ સદ્ધર છે.
ભણી રહ્યા બાદ પરદેશી વિદ્યાર્થીઓને અમેરિકામાં 'ઓપીટી' સમય દરમિયાન એક અને અમુકને વધુ બે વર્ષ કામ કરવાની પરવાનગી આપવામાં આવે છે. હવેથી એમને નોકરી મળતા મુશ્કેલી નડશે. ઇમિગ્રેશન ખાતું હવેથી આવા વિદ્યાર્થીઓ જ્યાં કામ કરતા હશે ત્યાં એમની અને એમના એમ્પ્લોયરોની ચકાસણી કરવા આવશે.
નોકરી માટે H-1B વિઝા જોઈએ. એ વાર્ષિક કોટાની સંખ્યા મર્યાદાથી સીમિત છે. હવેથી એ પહેલાંની જેમ સહેલાયથી મળી નહીં શકે. એમની ચકાસણી ઊંડાણપૂર્વક કરવામાં આવશે. લગભગ બધા જ કિસ્સામાં 'રિક્વેસ્ટ ફોર ફરધર ઇવિડન્સ' મોકલવામાં આવશે. ડિપેન્ડન્ટ એચ-૪ વિઝાધારકોને હાલમાં અમુક સંજોગોમાં કામ કરવાની છૂટ આપવામાં આવે છે. ટ્રમ્પ સરકાર એ બંધ કરવાનું વિચારી રહી છે. આંતર કંપની ટ્રાન્સફરી મેનેજરો, એક્ઝિક્યુટિવો અને ખાસ જાણકારીવાળી વ્યક્તિઓ માટે એલ-૧ વિઝા છે. એના રીજેક્શન રેટમાં ખૂબ મોટો વધારો જોવા મળે છે.
કૌટુંબિક સંબંધોના આધારે અમેરિકામાં કાયમ રહેવા માટેના જે ગ્રીનકાર્ડ આપવામાં આવે છે એ સર્વે કોટાનાં બંધનોથી સીમિત છે. આજે એની હેઠળ ઇમિગ્રન્ટ વિઝા મેળવવા માટે બેથી બાવીસ યા એથી વધુ વર્ષોની વાટ જોવી પડે છે. દિવસે દિવસે આ સમય લંબાતો જ જાય છે.
ઇન્વેસ્ટમૅન્ટ કરીને 'ઇબી-૫ પ્રોગ્રામ' હેઠળ જે ગ્રીનકાર્ડ આપવામાં આવતા હતા એ ઇબી-૫ પ્રોગ્રામની ઇન્વેસ્ટમૅન્ટની રકમમાં ધરખમ વધારો કરવામાં આવ્યો છે.
તો હવે કેમ કરીને વર્ષ ૨૦૨૦માં તમે સાકાર કરશો તમારાં અમેરિકાનાં સ્વપ્નાં?
ઉપાય એ છે કે કોઈ પણ પ્રકારના વિઝાની અરજી કરતાં પહેલાં એ પ્રકારના વિઝાની શું લાયકાત છે એ જાણી લેવી જોઈએ. તમારામાં એ લાયકાત છે કે નહીં, એની ખાતરી કરી લેવી જોઈએ. જો ન હોય તો એ મેળવવી જોઈએ. પછી વિઝાની અરજી કરવી જોઈએ. ખોટા દસ્તાવેજો રજૂ ન કરો. જૂઠું ન બોલો.
અમેરિકાના ઇમિગ્રેશનના કાયદાના જાણકાર ઍડ્વોકેટ આગળથી વિઝાની અરજી અને ઇન્ટરવ્યૂ માટે સંપૂર્ણ જાણકારી મેળવો. અમેરિકા કાયમ રહેવા જવાની ઇચ્છા હોય અને પૈસાની સગવડ હોય તો ૯ લાખ ડૉલર ઇન્વેસ્ટ કરીને પણ ઇબી-૫ પ્રોગ્રામ હેઠળ ગ્રીનકાર્ડ મેળવવું ખોટું નથી. તમને અને તમારી સાથે પત્ની/પતિ અને એકવીસ વર્ષથી નીચેની વયનાં અવિવાહિત સંતાનોને ત્રણેક વર્ષમાં ગ્રીનકાર્ડ મળી શકશે. રોકેલા નાણા પણ છ-સાત વર્ષમાં પાછા મળી જશે.
વર્ષ ૨૦૨૦માં તમે ધારો છો એટલું અમેરિકન સ્વપ્નું સાકાર કરવાનું અઘરું નથી. જરૃર છે ફક્ત સંપૂર્ણ જાણકારીની, અરજી કરતા સત્યતા જાળવવાની અને જો સગવડ હોય તો ઇન્વેસ્ટમૅન્ટ કરવાની.