ધાર્મિક વિરોધ / શિવજીનો વાસ હિમાલયમાં તો બીજું કેદારધામ કેમ બની શકે? દિલ્હી કેદાર મંદિરનો કેમ વિરોધ?

હિમાલયમાં ખુણે ખૂણે વિહરતાં ભગવાન શિવજીના ધામ પર એક મોટો વિવાદ શરુ થયો છે. દિલ્હીમાં કેદારનાથના પ્રતિકાત્મક મંદિરના નિર્માણને લઈને કેદારનાથ ધામથી લઈને સમગ્ર ઉત્તરાખંડમાં ઉગ્ર વિરોધ થઈ રહ્યો છે. જે બાદ આ મુદ્દે રાજકારણ પણ ગરમાયું છે. કેદારનાથ ધામના તીર્થયાત્રી પુજારી પાંડા સમાજ, સાધુ સંતો અને ચાર ધામના તીર્થયાત્રી પુજારીઓએ રાજ્ય સરકાર સામે ઉગ્ર વિરોધ દર્શાવ્યો છે અને દિલ્હીમાં ભગવાન કેદારનાથ મંદિરના નિર્માણના નિર્ણયને પાછો ખેંચવાની માંગ કરી છે.

ભગવાન શિવજીનો વાસ ફક્ત હિમાલયમાં

કોંગ્રેસે ઓમકારેશ્વર મંદિરમાં વિરોધ કરવાની જાહેરાત કરી છે. તેમજ તેના વિરોધમાં વિવિધ સ્થળોએ દેખાવો પણ શરૂ થયા છે. તીર્થયાત્રી પુજારીઓનો આક્ષેપ છે કે ધામમાં પ્રવર્તતી સમસ્યાઓનો ઉકેલ લાવવાને બદલે રાજ્ય સરકાર દિલ્હી જઈને ટ્રસ્ટ દ્વારા બનાવવામાં આવેલા મંદિરનો શિલાન્યાસ કરી રહી છે. બધાએ એક થઈને કહ્યું કે શિવ માત્ર હિમાલયમાં જ રહે છે.

શંકરાચાર્ય સ્વામી અવિમુક્તેશ્વરાનંદનો મોટો આરોપ

જ્યોતિર્મઠના શંકરાચાર્ય સ્વામી અવિમુક્તેશ્વરાનંદે દિલ્હીના બુરારીમાં બની રહેલા કેદારનાથ મંદિરને લઈને મોટો આરોપ લગાવ્યો છે. તેમણે કહ્યું છે કે કેદારનાથમાં સોનાનું કૌભાંડ થયું છે, તે મુદ્દો કેમ ઉઠાવવામાં આવતો નથી? તેમણે પૂછ્યું કે ત્યાં કૌભાંડ થયા બાદ હવે દિલ્હીમાં કેદારનાથનું નિર્માણ થશે. પછી કૌભાંડ થશે. દિલ્હીમાં કેદારનાથ મંદિર બની શકે નહીં. બાર જ્યોતિર્લિંગની વ્યાખ્યા કરવામાં આવી છે. તેનું સ્થાન નિશ્ચિત છે. તે ખોટું છે.

વધુ વાંચો : 'ઉદ્ધવ ઠાકરે સાથે વિશ્વાસઘાત થયો, સાચો હિંદુ દગો ન કરી શકે'- શંકરાચાર્ય અવિમુક્તેશ્વરાનંદ

દિલ્હી મંદિર સાથે સરકાર કે સમિતીને કંઈ લેવાદેવા નહીં

BKTCનું શું કહેવું છે શ્રી બદ્રીનાથ-કેદારનાથ મંદિર સમિતિ (BKTC)ના પ્રમુખ અજેન્દ્ર અજયે કહ્યું કે આ પ્રતિકૃતિ સાથે રાજ્ય સરકાર કે મંદિર સમિતિને કંઈ લેવાદેવા નથી. તેમણે કહ્યું કે જો સંબંધિત સંસ્થા કેદારનાથ ધામના નામનો દુરુપયોગ કરે છે અથવા દાન એકત્રિત કરે છે, તો મંદિર સમિતિ કાયદેસરની કાર્યવાહી કરશે, આ માટે અધિકારીઓને નિર્દેશ આપવામાં આવ્યા છે. તેમણે કહ્યું કે પ્રસ્તાવિત મંદિરના શિલાન્યાસ કાર્યક્રમમાં હાજરી આપવા માટે મુખ્યમંત્રી ધામી કેટલાક ધારાસભ્યો, જનપ્રતિનિધિઓ અને સંતોની વિનંતી પર દિલ્હી ગયા હતા. અજેન્દ્રનો આરોપ છે કે 2015માં મુંબઈમાં વસઈ નામની જગ્યાએ 11 કરોડ રૂપિયાના ખર્ચે ભવ્ય બદ્રીનાથ મંદિર બનાવવામાં આવ્યું હતું. સમારોહ પ્રસંગે કોંગ્રેસના તત્કાલિન મુખ્યમંત્રી હરીશ રાવતે કાર્યક્રમમાં ભાગ લીધો હતો. ત્યારે કોંગ્રેસીઓ દ્વારા એવું કહેવામાં આવ્યું હતું કે એક જ નામથી મંદિર બનાવવાથી કોઈ ફરક નહીં પડે. હવે કોંગ્રેસ આ બાબતને બિનજરૂરી રીતે મહત્વ આપી રહી છે.

કેદારનાથ ધામ ટ્રસ્ટે શું કહ્યું

કેદારનાથ ધામ ટ્રસ્ટ બુરારીના પ્રમુખ સુરિન્દર રૌતેલાએ એક નિવેદન જારી કરીને સ્થિતિ સ્પષ્ટ કરી છે. તેમણે કહ્યું કે કેદારનાથ મંદિર દિલ્હીમાં બની રહ્યું છે, ધામ નહીં. ટ્રસ્ટ તેનું નિર્માણ કરાવી રહ્યું છે. ઉત્તરાખંડ સરકારને તેની સાથે કોઈ લેવાદેવા નથી.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ