પોપ સિંગર કેટી પેરી અને અભિનેતા ઓર્લાન્ડો બ્લૂમે કોરોના વાયરસના પગલે જાપાનમાં તેમના લગ્ન મુલતવી રાખવાનો નિર્ણય લીધો છે. ચીનથી આવેલો આ નવો કોરોના વાયરસ અમેરિકા, ઇટલી અને ઈરાન સહિત 60થી વધુ દેશોમાં ફેલાઈ ગયો છે. એક મેગેઝિનના જણાવ્યા પ્રમાણે, કેટી ગર્ભવતી છે અને આ કપલ જૂનમાં લગ્ન કરવાની તૈયારીઓમાં લાગેલું હતું ત્યારે હવે કોરોનાને કારણે તેમણે લગ્ન ટાળવાનો નિર્ણય લીધો છે.
હોલિવૂડની દિગ્ગજ પોપ સિંગર કેટી પેરી અને ઓર્લાન્ડોના લગ્ન ટળ્યા
આ કપલની નજીકના એક સ્ત્રોતે મેગેઝિનને કહ્યું કે, 'જાપાનમાં 150 મહેમાનો સાથે લગ્નની સંપૂર્ણ તૈયારી થઈ ગઈ હતી. ગર્ભાવસ્થામાં લગ્ન કરવા વિશે કેટી ખરેખર ઉત્સાહિત હતી. તે ખૂબ જ ખુશ હતી કે લગ્ન માટેની તમામ તૈયારીઓ સારી રીતે ચાલી રહી છે, પરંતુ કોરોના વાયરસને કારણે હવે અડચણ આવી ગઈ છે.
પેરી (35)એ ગુરુવારે આ વાતની પુષ્ટિ કરી હતી કે, તે અને બ્લૂમ (43) તેમના પહેલા બાળકના જન્મની તૈયારીઓ કરી રહ્યા છે. સિંગરે આની જાહેરાત 'નેવર વોર્ન વ્હાઇટ' વીડિયો શેર કરીને કરી હતી.
હોલિવૂડ જ નહીં પરંતુ બોલિવૂડની પણ ઘણી મોટી ઈવેન્ટ્સ કોરોનાને કારણે ટળી રહી છે. એવા અહેવાલો છે કે, આ વાયરસને કારણે ઘણી ફિલ્મોનું શૂટિંગ રદ કરવામાં આવ્યું છે. સલમાન ખાનની ફિલ્મ રાધે પછી હવે અક્ષય કુમારની ફિલ્મ પૃથ્વીરાજ અને કરણ જોહરની અપકમિંગ ફિલ્મ તખ્તનું પણ શૂટિંગ રોકી દેવામાં આવ્યું છે.
મીડિયા રિપોર્ટ્સ અનુસાર અક્ષય કુમારની ફિલ્મ 'પૃથ્વીરાજ'નું શૂટિંગ રોકી દેવાયું છે. રાજસ્થાનમાં આ ફિલ્મનું શૂટિંગ ચાલી રહ્યું હતું. એટલું જ નહીં, હવે ફિલ્મનું શૂટિંગ રાજસ્થાનને બદલે મુંબઈમાં શિફ્ટ કરવામાં આવ્યું છે. આ ફિલ્મ સિવાય કરણ જોહરની ફિલ્મ 'તખ્ત'નું શૂટિંગ શરૂ કરાયું હતું, પરંતુ હવે તે પણ બંધ કરી દેવામાં આવ્યું છે. આ ફિલ્મનું શૂટિંગ જયપુર અને જેસલમેરમાં થવાનું હતું.
આવું જ કંઇક કાર્તિક આર્યન અને કિયારા અડવાણીની આગામી ફિલ્મ 'ભૂલ ભુલૈયા 2' સાથે થયું છે. આ ફિલ્મનું શૂટિંગ રાજસ્થાનમાં શરૂ થયું હતું, પરંતુ હવે તેનું શૂટિંગ લખનૌમાં શિફ્ટ કરવામાં આવ્યું છે.