ઘાતક દોરીને પગલે વધુ બે માનવ જિંદગી મોતના ખપ્પરમાં હોમાતા હાહાકાર મચી ગયો છે. જેમાં સુરત અને ભાવનગરમાં કાતિલ દોરીને પગલે સર્જાયેલ કરૂણાંતિકામાં બે બાળકો મોતને ભેટ્યા છે.
સુરત, ભાવનગરમાં પતંગની દોરીથી બે બાળકના મોત
ભાવનગરમાં અઢી વર્ષની બાળકીનું ગળુ કપાતા મૃત્યુ
સુરતમાં બાઇક પર આગળ બેઠેલ બાળકનુ ગળુ કપાયું
ઉત્તરાયણ પર્વની મજા હવે અનેક શહેરોમાં મોતના માતમમાં ફેરવાઈ રહી છે જેમાં ઘાતક દોરીથી થતા મોતનો સીલશીલો અટકવાનું નામ જ લેતો નથી. તેવામાં આજે ભાવનગરમાં બાળકીના ગળામાં દોરી આવી જતા તેનું મોત નીપજ્યું હતું. જ્યારે સુરતમાં પણ ગળામા દોરી ભરાઈ જતા બાળક મોતને ભેટ્યો હતો.
ભાવનગરમાં અઢી વર્ષની બાળકીનું મોત
ભાવનગરમાં શહેરના લાલટાંકી વિસ્તારમાંથી એક પરિવાર બાઇક લઈ જઈ રહ્યો હતો. આ વેળાએ બાઇક પર આગળ બેઠેલ બાળકીના ગળામાં પતંગની જીવલેણ દોરી અટકાઈ ગઈ હતી. જેને લઈને બાળકીને ગંભીર ઇજા થવા પામી હતી આથી તેને લોહીલુહાણ હાલતમાં સારવાર અર્થે ખસેડવામાં આવી હતી. જ્યા ફરજ પરના તબીબે બાળકીને મૃત જાહેર કરી હતી આથી પરિવારજનોમાં રોકકળાટ ફેલાયો હતો.
24 કલાકમાં સુરતમાં બે મૃત્યુ
બીજી તરફ સુરતના કામરેજમાં પણ કરૂણાંતિકા સર્જાઈ હતી. એક પરિવાર બાઇક લઈ જઈ રહ્યો આ દરમિયાન બાળક બાઈક ઉપર આગળ બેઠો હતો. જે બાળકના ગળામાં પતંગની દોરી વીંટળાઈ ગઈ હતી જેને લઈને બાળકને ગંભીર ઇજા થવા પામી હતી. જોકે બાળકને પૂરતી સારવાર મળે તે પહેલા જ રસ્તામાં કાળ આંબી જતા બાળકનું મોત નીપજ્યું હતી. મહત્વનું છે કે ગઈકાલે પણ એક યુવાનનું ઘાતક દોરીથી ઘવાયા બાદ મૃત્યુ થયું હતું. આમ દોરીએ 24 કલાકમાં 2 માનવજિંદગીનો ભોગ લેતા હાહાકાર મચી ગયો છે.