બન્નીનું ઘાસનું મેદાન ત્યાંના પક્ષીઓ માટે તો પ્રખ્યાત છે જ પણ આ મેદાનમાં તથા કિરો ડુંગરની તળેટી આસપાસના વિસ્તારમાં અંધારી રાતે ક્ષિતિજથી થોડે ઉંચે અચાનક અને અનાયાસ જ દેખાતા ચમકદાર પ્રકાશના કારણે પણ આ વિસ્તાર વિશ્વભરના સાહસિકોના મનમાં ઉત્સુકતા જગાવે છે.
રંગ અને જગ્યા બદલતો આ પ્રકાશ ક્યાંથી આવે છે અને કેવી રીતે ઉદ્ભવે છે તેનું રહસ્ય અનેક વાયકાઓ હોવા છતાં હજુ અણઉકલ્યું જ રહ્યું છે. સદીઓથી આ વિસ્તારમાં રાતના સમયે રહસ્યમય પ્રકાશ દેખાય છે. ફલાય, છારી, તલ, લૈયારી, મોટી મૂર, વઝીરા, બઘડિયા જેવા ગામો પાસેના વિસ્તારમાં આ પ્રકાશ વારંવાર દેખાય છે.
અહીં પશુઓ ચારવા આવતા માલધારીઓ તેના અસ્તિત્વથી પરિચિત છે, તો પક્ષીઓ નિહાળવા આવનારા પ્રકૃતિપ્રેમીઓને અને રાત-દિવસ સરહદની ચોકી કરતાં બી.એસ.એફ.ના જવાનોને પણ ક્યારેક આ પ્રકાશ જોવા મળે છે.
સ્થાનિક લોકોમાં એવી માન્યતા છે કે જો કોઇ વ્યક્તિ આ પ્રકાશનું મૂળ શોધવા તેની પાસે જવા પ્રયત્ન કરે તો તે પોતાની જગ્યા બદલે છે અને લોકોને કોઇ નિર્જન રણ કે કાંટળા ઝાંખરાવાળી જગ્યાએ પહોંચાડે છે. પરંતુ જો કોઇ તેની તરફ ધ્યાન ન આપે તો પ્રકાશ તે વ્યક્તિનો પીછો કરે છે, જાણે સંતાકૂકડી રમે છે. જો કે આ પ્રકાશ કોઇને નુકશાન પહોંચાડતો નથી.
સ્થાનિક કચ્છી સિંધી ભાષામાં છર એટલે ભૂત અને બત્તી એટલે પ્રકાશ. આમ આ પ્રકાશ કચ્છમાં છર અથવા છીર બત્તી તરીકે જાણિતો છે. આ પ્રકાશ ક્યારેક તીવ્ર વેગે પ્રવાસ કરે છે તો ક્યારેક સ્થિર થયેલો પણ જોવા મળે છે. ક્યારેક ધીમે-ધીમે જગ્યા બદલે છે. આ પ્રકાશ મર્ક્યુરી લાઇટ જેવો પ્રકાશિત હોય છે, તે ભૂરા, સફેદ, લાલ કે પીળા રંગમાં દેખાય છે. સામાન્ય રીતે આકાશમાં અચાનક દેખાતા પ્રકાશનો એક પ્રકારનો બીમ (શેરડો) દેખાય છે પરંતુ અહીં દેખાતા પ્રકાશનો બીમ હોતો નથી.
આ પ્રકાશ જમીનથી ઓછામાં ઓછો બે ફૂટ ઉપર અને 8થી 10 ફૂટ હવામાં દેખાય છે. આ પ્રકાશ એક સાથે બેથી ત્રણ જગ્યાએ પણ ક્યારેક દેખાય છે. તો ક્યારેક એકમાંથી બે પણ થાય છે. કચ્છમાં પ્રવાસન વધ્યું પરંતુ આ પ્રકાશ જોવા ઇચ્છતા પ્રવાસીઓને તે બતાવી શકાય તેમ નથી. કારણ આ પ્રકાશ ગમે ત્યારે, ગમે ત્યાં, અનાયાસ દેખાય છે. તેનો કોઇ સમય કે જગ્યા નિશ્ચિત નથી.